ಅಂಚೆಯವನು

ಓಲೆಯ ಹಂಚಲು ಹೊರಡುವೆ ನಾನು

ತೋರಲು ಆಗಸದಲಿ ಬಿಳಿ ಬಾನು

ಮನೆಯಲಿ ನೀವು ಬಿಸಿಲಲಿ ನಾನು

ಕಾಗದ ಬಂತು ಕಾಗದವು

ಹೆಗಲಲಿ ಹಳದಿಯ ಹಸುಬೆಯ ನೀಡಿ

ಕಾಲಲಿ ಚರ್ಮದ ಜೋಡಿ

ತಲೆಯಲಿ ಖಾಕಿಯ ಪಗಡಿಯ ನೋಡಿ

ಕಾಗದ ಬಂತು ಕಾಗದವು

ಒಳಗಿಂದಲಿ ಜನರೆನ್ನನು ಕಂಡು

ಬೇಗನೆ ಹೊರ ಅಂಗಳಕೈತಂದು

ಕಾಗದವಿದೆಯೇ ಎನ್ನುವುದುಂಟು

ಕಾಗದ ಬಂತು ಕಾಗದವು

ಸೊಗಸಿನ ಸುದ್ದಿಯ ಕೊಡುವೆನು ನಿಮಗೆ

ವ್ಯಸನದ ವಾರ್ತೆಯ ಕೊಡುವೆನು ತಮಗೆ

ಎಲ್ಲ ಸುದ್ದಿಗಳೊಂದೇ ನಮಗೆ

ಕಾಗದ ಬಂತು ಕಾಗದವು

ಓಲೆಯ ಕೊಡುವಧಿಕಾರಿಯು ನಾನು

ಆದರು ಅದರಲಿ ಬರೆದುದು ಏನು

ಎಂಬುದನರಿಯದ ಬಲು ಸುಖಿ ನಾನು

ಕಾಗದ ಬಂತು ಕಾಗದವು

***