ತಾರಾ ನಾಯಕ ...

ಮೋಡದ ಮರೆಯಲಿ
ಓಡುವ ಚಂದಿರ

ಕಣ್ಣ ಮುಚ್ಚಾಲೆ ಆಡುವೆಯ ?

ಮಲ್ಲಿಗೆ ಪರಿಮಳ
ಪಸರಿಪ ಸಮಯಕೆ
ಮೆಲ್ಲನೆ ಬಾನಲಿ ಮೂಡುವೆಯ?

ಬಾನಲಿ ಬೆಳ್ಳಿಯ
ಬೆಳಕನು ಬೀರುತ
ತಾರಾನಾಯಕ ನಗುತಿಹೆಯ ?

ಮಕ್ಕಳ ಮನದಲಿ
ಸಂತಸ ಉಕ್ಕಿಸಿ
ಮನಸಿಗೆ ಮುದವನು ನೀಡುವೆಯ?

***

ನೆಲ್ಲಿಕಾಯಿ

ಬೆಟ್ಟದ ಮೇಲಿನ ನೆಲ್ಲಿಕಾಯಿ

ಮರದಲಿ ತುಂಬಿಹ ನೆಲ್ಲಿಕಾಯಿ

ತಿನ್ನಲು ಹುಳಿ ಹುಳಿ ನೆಲ್ಲಿಕಾಯಿ

ನೀರನು ಕುಡಿಯೆ ಸಿಹಿಯದು ಬಾಯಿ

ಸೇರಿಸೆ ಉಪ್ಪನು ನೆಲ್ಲಿಕಾಯಿ

ಮಾಡುವಳಮ್ಮ ಉಪ್ಪಿನಕಾಯಿ

ರುಚಿಯನು ಹೆಚ್ಚಿಪ ನೆಲ್ಲಿಕಾಯಿ

ಪ್ರಕೃತಿ ಕಾಣಿಕೆ ನೆಲ್ಲಿ ಕಾಯಿ

***

ಕನ್ನಡ ನಾಡು

ಚಿನ್ನದ ನಾಡು ಗಂಧದ ಬೀಡು

ಜೇನಿನ ಗೂಡಿದು ಕನ್ನಡವು

ಸುಂದರ ವನಗಳ ಚೆಂದದ ಹೊಲಗಳ

ಚೆಲುವಿನ ನಾಡಿದು ಕನ್ನಡವು

ಜುಳು ಜುಳು ಹರಿಯುವ ತೊರೆಗಳ ಕಲರವ

ಮೊರೆಯುವ ನಾಡಿದು ಕನ್ನಡವು

ತೆಂಗು ಕಂಗು ಬಾಳೆ ತಾಳೆಗಳ

ತೋಟದ ಸೊಬಗಿನ ಕನ್ನಡವು

ನವಿಲಿನ ನರ್ತನ ಕೋಗಿಲೆ ಕೂಜನ

ಶುಕಧ್ವನಿ ಮೊಳಗಿದ ಕನ್ನಡವು

ಕಪಿಗಳ ದಂಡು ಆನೆಯ ಹಿಂಡು

ಖಗ ಮೃಗ ತಳಕಿನ ಕನ್ನಡವು

ರಾಜಾಧಿರಾಜರು ಆಳಿದ ನಾಡು

ವೈಭವ ಮೆರೆದಿಹ ಕನ್ನಡವು

ಕವಿ ಪುಂಗವರು ಬಾಳಿದ ನಾಡು

ಸಾಹಿತ್ಯ ಸ್ಪೂರ್ತಿಯ ಕನ್ನಡವು

ಸಂಸ್ಕೃತಿ ಕಲೆಗಳು ತುಳುಕಿದ ನಾಡು

ಸುಖ ಶಾಂತಿ ನೆಲೆಸಿದ ಕನ್ನಡವು

ಶರಣರು ಸಂತರು ಬದುಕಿದ ನಾಡು

ಪುಣ್ಯ ಭೂಮಿಯಿದು ಕನ್ನಡವು

-ಆರ್. ಎಸ . ಚಾಪಗಾವಿ

ಬಾಲನ ಕರೆ ....

ಮೂಡಿದ ರವಿಯು

ಮುಳುಗುವ ಸಮಯಕೆ

ಗೂಡನು ಸೇರುವ ಹಕ್ಕಿಗಳೇ

ದಿನವಿಡೀ ಕಾಡಲಿ

ನಾಡಲಿ ಹಾರುತ

ಕಾಳನು ಅರಸುವ ಹಕ್ಕಿಗಳೇ

ವಿಧ ವಿಧ ಬಣ್ಣದಿ

ಮಧುರ ಸ್ವರದಲಿ

ಚಿಲಿ ಪಿಲಿಗುಟ್ಟುವ ಹಕ್ಕಿಗಳೇ

ಸಂಜೆಯ ಹೊತ್ತಲಿ

ನಿಮ್ಮೊಡನಾಡಲು

ಬರುತಿಹೆ ನಾನು ಹಕ್ಕಿಗಳೇ

***

ಸೂರ್ಯನಿಗೆ ನಮನ

ಸಹಸ್ರ ರಶ್ಮಿಯನು ಬೀರುವ

ಜಗದ ಕರ್ಮದ ಸಾಕ್ಷಿಯೇ

ತೇಜೋಮಯ ಪ್ರದೀಪ ನಿನ್ನಯ

ಚರಣಕನುದಿನ ನಮಿಸುವೆ

ಪುಂಜ ಪುಂಜದಿ ಬೆಳಕನೀಯುತ

ಮೂಡು ದಿಕ್ಕಲಿ ಮೂಡುವೆ

ಮತ್ತೆ ಏರುತ ಪ್ರಖರನಾಗುತ

ಭೂಮಿಯನ್ನು ಬೆಳಗುವೆ

ಹೊನ್ನ ಬಣ್ಣದ ಕಿರಣವೀಯುತ

ಮೋಡದೆಡೆಯಲಿ ಅಡಗುವೆ

ಮತ್ತೆ ಸಂಜೆಯ ತಂಪು ಕಂಪಲಿ

ಶರಧಿಯಾಚೆಗೆ ಇಳಿಯುವೆ

ಸಸ್ಯ ಪ್ರಾಣಿ ಸಂಕುಲವನೆಲ್ಲವ

ಕಾಲ ಕಾಲಕೆ ಬೆಳೆಸುವೆ

ಜಗದ ಜೀವಕೆ ಆರೋಗ್ಯ ಭಾಗ್ಯವ

ಕೊಡುವ ನಿನಗೆ ನಮಿಸುವೆ .

**

ಚಂದಿರ ಬಾ ಬಾರೋ ..

ಮಾಮರದೆಡೆಯಲಿ

ಮೋಡದ ಮರೆಯಲಿ

ಚಲಿಸುವ ಚಂದಿರ ಬಾ ಬಾರೋ

ತಿಂಗಳ ಬೆಳಕಿನ

ತಂಪಿನ ಕಿರಣವ

ಬೀರುವ ಚಂದಿರ ಬಾ ಬಾರೋ

ಹೂವಿನ ಪರಿಮಳ

ತಣ್ಣನೆ ಗಾಳಿಯ

ಜೊತೆ ಸೇರುತ ನೀ ಬಾ ಬಾರೋ

ಅಮ್ಮನ ಜೊತೆಗೆ

ಹಾಡನು ಹಾಡುತ

ಕಾಯುವೆ ನಿನಗೆ ಬಾ ಬಾರೋ

***

ಉದಯವಾಗಲಿ

ಉದಯವಾಗಲಿ ನಮ್ಮ ಚೆಲುವ ಕನ್ನಡನಾಡು

ಬದುಕು ಬಲುಹಿನ ನಿಧಿಯು ಸದಭಿಮಾನದ ಗೂಡು.

ರಾಜನ್ಯರಿಪು ಪರಶುರಾಮನಮ್ಮನ ನಾಡು

ಆ ಜಲಧಿಯನೆ ಜಿಗಿದ ಹನುಮನುದಿಸಿದ ನಾಡು

ಓಜೆಯಿಂ ಮೆರೆದರಸುಗಳ ಸಾಹಸದ ಸೂಡು

ತೇಜವನು ನಮಗೀವ ವೀರವೃಂದದ ಬೀಡು.

ಲೆಕ್ಕಿಗಮಿತಾಕ್ಷರರು ಬೆಳೆದು ಮೆರೆದಿಹ ನಾಡು

ಜಕ್ಕಣನ ಶಿಲ್ಪಕಲೆಯಚ್ಚರಿಯ ಕರುಗೋಡು

ಚೊಕ್ಕಮತಗಳ ಸಾರಿದವರಿಗಿದು ನೆಲೆವೀಡು

ಬೊಕ್ಕಸದ ಕಣಜವೈ ವಿದ್ವತ್ತೆಗಳ ಕಾಡು.

ಪಾವನೆಯರಾ ಕೃಷ್ಣೆ ಭೀಮೆಯರ ತಾಯ್ನಾಡು

ಕಾವೇರಿ ಗೋದೆಯರು ಮೈದೊಳೆವ ನಲುನಾಡು

ಆವಗಂ ಸ್ಪೂರ್ತಿಸುವ ಕಬ್ಬಿಗರ ನಡೆಮಾಡು

ಕಾವ ಗದುಗಿನ ವೀರನಾರಾಯಣನ ಬೀಡು.

ಕವಿ : ಹುಯಿಲಗೋಳ ನಾರಾಯಣರಾಯರು