ಫುಟ್ಬಾಲ್

ಅಪ್ಪನು ಕೊಡಿಸಿದ

ದೊಡ್ಡ ಚೆಂಡು

ಕಾಲಲಿ ಒದೆಯುವ

ದೊಡ್ಡ ಚೆಂಡು

ಗೆಳೆಯರ ಕೂಡಿ

ಆಡುವ ಚೆಂಡು

ಒಂದೇ ಒದೆತಕೆ

ಹಾರುವ ಚೆಂಡು

ಆಗಸದೆತ್ತರ

ಪುಟಿಯುವ ಚೆಂಡು

ಅಪ್ಪನು ಕೊಡಿಸಿದ
ದೊಡ್ಡ ಚೆಂಡು
ಕಾಲಲಿ ಒದೆಯುವ
ದೊಡ್ಡ ಚೆಂಡು

***

ಚೈತ್ರದ ಬರುವಿಗೆ

ಚೈತ್ರದ ಬರುವಿಗೆ

ವಸುಮತಿ ವೈಭವ

ಬಣ್ಣದ ಮೇಳವ ನಡೆಸುತಿದೆ

ಕಾಣುವ ಕಣ್ಣಿಗೆ

ಚೆಲುವಿನ ಸಂಭ್ರಮ

ಮೋಹಕ ಕಾವ್ಯವ ಬರೆಯುತಿದೆ

ಯಾವೆಡೆ ನೋಡಲಿ

ಹೂವಿನ ಬೆಡಗು

ರಂಗಿನ ಚಿತ್ರವ ಬರೆಯುತಿದೆ

ಅನುಪಮ ಕೋಗಿಲೆ

ತಳಿರನು ಸವಿದು

ಇಂಪಿನ ಗಾನವ ಹಾಡುತಿದೆ

ನೀಲಿಯ ಗಗನದಿ

ಬೆಳ್ಳಿಯ ಮುಗಿಲು

ಹಾಲಿನ ಹರವಿಯ ಚೆಲ್ಲುತಿದೆ

ಹುಣ್ಣಿಮೆ ಚಂದಿರ

ಕಂಪನು ಸುರಿದು

ಕವಿತೆಗೆ ಪ್ರೇರಣೆ ತುಂಬುತಿದೆ

***

ಅವರೆ ಬಳ್ಳಿ

ಅಮ್ಮನು ಬೆಳೆಸಿದ

ಅವರೆ ಬಳ್ಳಿ

ಅಂಗಳ ತುಂಬಾ

ಹಬ್ಬಿದ ಬಳ್ಳಿ

ಗೊಂಚಲು ಗೊಂಚಲು

ಕಾಯ್ಗಳು ಹುಟ್ಟಿ

ಅಮ್ಮನು ತರುವಳು

ತುಂಬಿಸಿ ಬುಟ್ಟಿ

***

ಗೊಂಬೆ

ಗೊಂಬೆಯ ಕೊಳ್ಳಿರಿ ಗೊ೦ಬೆಯನು

ಅಂದದ ಚೆಂದದ ಗೊ೦ಬೆಯನು

ಚಂದದ ಮರದ ಗೊ೦ಬೆಯನು

ಹೊಳೆಯುವ ಗಾಜಿನ ಗೊ೦ಬೆಯನು

ಬಣ್ಣದ ಮಣ್ಣಿನ ಗೊ೦ಬೆಯನು

ಮೆತ್ತನೆ ಬಟ್ಟೆಯ ಗೊ೦ಬೆಯನು

ಗೊಂಬೆಯ ಕೊಳ್ಳಿರಿ ಗೊ೦ಬೆಯನು
ಅಂದದ ಚೆಂದದ ಗೊ೦ಬೆಯನು

***

ತಟ್ಟನೆ ಹೇಳಿರಿ ..

ಹಕ್ಕಿಯ ತೆರದಲಿ ನಭದಲಿ ಹಾರುವೆ

ರೆಕ್ಕೆಗಳೆನಗಿಲ್ಲ

ಮರಿಗಳ ಹೆರುತಲಿ ಮೊಲೆಯನ್ನುಣಿಸುವೆ

ಕಾಡಿನ ಮೃಗವಲ್ಲ !

ಕರಿ ಕರಿ ಬಣ್ಣದ ಕೊಡೆಯನು ಬಿಡಿಸುತ

ಅಲೆವೆನು ಇರುಳಲ್ಲಿ

ಎನ್ನಯ ಬಂಧುಗಳೆಲ್ಲರ ಕೂಡುತ

ನಿದ್ರಿಪೆ ಹಗಲಲ್ಲಿ

ಮೊಗವಿದೆ ಕಿವಿಯಿದೆ ಹಲ್ಲುಗಳೆನಗಿವೆ

ಬಾಲವು ಎನಗಿಲ್ಲ

ಕಾಳುಗಲೆರಡಿದ್ದರು ನಾನೆಲದಲಿ

ನಡೆಯುವ ಪರಿಯಿಲ್ಲ

ವೃಕ್ಷಗಳಲಿ ತಲೆಕೆಳಗಿರಿಸುತ

ತೊಟ್ಟಿಲ ತೂಗುವೆನು

ತೋಟಗಳಲ್ಲಿ ಬೇಟೆಯನಾಡುತ

ಹಣ್ಗಳನುಣ್ಣುವೆನು

ಬಾವಿಯ ಆದಿಲಿ ಭವನದ ನಡುವಲಿ
ಬೇಲಿಯ ಕೊನೆಯಲ್ಲಿ

ಎನ್ನದೆ ಹೆಸರಿದೆ ತಟ್ಟನೆ ಪೇಳಿರಿ

ಮೂರಕ್ಷರಗಳಲಿ !

(ಕವಿ : ಮುಂಡಾಜೆ ರಾಮಚಂದ್ರ ಭಟ್ )

***

ಕಂಬಳ

ಕಂಬಳ ಕಂಬಳ ಕಂಬಳ
ಓಟದ ಕೋಣದ ಕಂಬಳ
ಕೆಸರು ಗದ್ದೆ ಕಂಬಳ
ಕೊಬ್ಬಿದ ಕೋಣದ ಕಂಬಳ
ಹಗ್ಗದ ಕೋಣದ ಕಂಬಳ
ಬಿಳಿಯ ನಿಶಾನೆಯ ಕಂಬಳ
ಡೋಲಿನ ಡಂ ಡಂ ಕಂಬಳ
ಮಿಠಾಯಿ ತಿಂಡಿ ಕಂಬಳ
ತೂಗುವ ತೊಟ್ಟಿಲ ಕಂಬಳ
ನಾನೂ ಅಪ್ಪನು ನೋಡುವ
ನಮ್ಮ ಊರಿನ ಕಂಬಳ
***

ದಾಸಯ್ಯ

ದಾಸಯ್ಯ ಬಂದ ನಮ್ಮನೆಗೆ

ಜೋಳಿಗೆ ಹಿಡಿದು ಬಾಗಿಲಿಗೆ

ಬಿಳಿಯ ಪಂಚೆ ಉಟ್ಟಿದ್ದ

ಚಂದದ ನಾಮವ ಹಾಕಿದ್ದ

ದೀಪದ ಕಂಬವ ಹಿಡಿದಿದ್ದ

ಎಣ್ಣೆಯ ಬತ್ತಿಯ ಬೇಡಿದ್ದ

ಭಂ ಭಂ ಶಂಖವ ಊದಿದ್ದ

ಡಣ ಡಣ ಜಾಗಟೆ ಬಾರಿಸಿದ

ದಾಸಯ್ಯ ಬಂದ ನಮ್ಮನೆಗೆ
ಜೋಳಿಗೆ ಹಿಡಿದು ಬಾಗಿಲಿಗೆ

***

ನಿನ್ನನು ವಂದಿಪೆ ..

ನಿನ್ನನು ವಂದಿಪೆ ನಿನ್ನನು ಬೇಡುವೆ

ಎನ್ನನು ಸಲಹೈ ದೇವ

ವಿದ್ಯೆಯ ಕೊಡು ನೀ ಬುದ್ಧಿಯ ಕೊಡು ನೀ

ಸಕಲವ ಕೊಡು ನೀ ದೇವ

ತಾಯಿಯು ನೀನೆ ತಂದೆಯು ನೀನೆ

ಬಂಧುವು ನೀನೆ ದೇವ

ನಿನ್ನ ನೆನಹದು ಎನ್ನೀ ಹೃದಯದಿ

ಸತತವು ನೆಲೆಸಲಿ ದೇವ

ನಿನ್ನನು ವಂದಿಪೆ ನಿನ್ನನು ಬೇಡುವೆ
ಎನ್ನನು ಸಲಹೈ ದೇವ

(kavi : ಪಳ್ಳತ್ತಡ್ಕ ಸುಬ್ರಾಯ ಭಟ್ )

***

ತರಕಾರಿ

ತರಕಾರಿ ತರಕಾರಿ

ಅಮ್ಮನು ತಂದ ತರಕಾರಿ

ದಪ್ಪನೆ ಇರುವ ಕುಂಬಳ ಕಾಯಿ

ಉದ್ದನೆ ಇರುವ ಪಡುವಲ ಕಾಯಿ

ಸಣ್ಣಗೆ ಇರುವ ಬೆಂಡೆಕಾಯಿ

ನುಣ್ಣಗೆ ಇರುವ ತೊಂಡೆ ಕಾಯಿ

ಅಮ್ಮನು ತಂದ ತರಕಾರಿ

ನಾನು ತಿನ್ನುವ ತರಕಾರಿ

***

ಕರು

ನಮ್ಮ ಕರು ಪುಟ್ಟ ಕರು

ನಮ್ಮ ಹಸುವಿನ ಪುಟ್ಟ ಕರು

ಚೆಂಗು ಚೆಂಗನೆ ನೆಗೆಯುವ ಕರು

ಅಮ್ಮನ ಬಿಟ್ಟು ಓಡದ ಕರು

ಕಂಡು ಬಣ್ಣದ ನಮ್ಮ ಕರು

ನಮ್ಮ ಹಸುವಿನ ಮುದ್ದು ಕರು

***

ಪಾರಿವಾಳ

ಶಾಲೆಗೊಂದು ಪಾರಿವಾಳ

ಹಾರಿ ಬಂದಿತು

ಅದನು ಕಂಡು ಪುಟ್ಟ ಪಾಪ

ಕೈಯ ತಟ್ಟಿತು

ಸದ್ದು ಕೇಳಿ ಪಾರಿವಾಳ

ಹಾರಿ ಹೋಯಿತು

ಪುಟ್ಟ ಪಾಪ ಅದನು ಕಂಡು

ನಿಂತೇ ಬಿಟ್ಟಿತು

***

ರೈತ

ನೇಗಿಲ ಹೊತ್ತು

ಹೊಲವನ್ನು ಬಿತ್ತು

ದಿನ ದಿನ ದುಡಿದನು ಸೋಮಣ್ಣ

ಬೀಜವ ಬಿತ್ತಿ

ಜೋಳವ ಬೆಳೆಸಿ

ರಾಶಿಯ ಮಾಡಿದ ಸೋಮಣ್ಣ

ಅಕ್ಕಿಯ ಬೆಳೆದು

ಅನ್ನವ ನೀಡಿ

ಎಲ್ಲರ ಪೊರೆಯುವ ಸೋಮಣ್ಣ

ಕಾಯಕದಲ್ಲಿ ಕೈಲಾಸ

ಕಂಡು ಸುಖ ಸಂತೋಷವ

ಹಂಚುವ ನಮ್ಮ ಸೋಮಣ್ಣ

***

ನವಿಲೇ

ನವಿಲೇ ನವಿಲೇ

ಬಾ ಬಾ ಬಾ

ಬಣ್ಣದ ನವಿಲೇ

ಬಾ ಬಾ ಬಾ

ನಿನ್ನ ಗರಿಯ

ಬಣ್ಣ ಚೆಂದ

ತಲೆಯ ಜುಟ್ಟು

ಬಹಳ ಅಂದ

ನವಿಲೇ ನವಿಲೇ
ಬಾ ಬಾ ಬಾ
ಬಣ್ಣದ ನವಿಲೇ
ಬಾ ಬಾ ಬಾ

***

ಹಗ್ಗ

ನೀರೆಳೆಯಲು ಬೇಕು ನಾರಿನ ಹಗ್ಗ

ಬಟ್ಟೆಯ ಒಣಗಿಸೆ ನೂಲಿನ ಹಗ್ಗ

ಹಸುವನು ಹಿಡಿಯಲು ಉದ್ದನೆ ಹಗ್ಗ

ಕಂತೆಯ ಕಟ್ಟಲು ಸಣ್ಣನೆ ಹಗ್ಗ

ಆಟವ ಆಡಲು ಬಣ್ಣದ ಹಗ್ಗ

ಆಡುತ ಓಡಲು ಆಟದ ಹಗ್ಗ

***

ನೀರು

ಅಣ್ಣನು ಕುಡಿವನು

ತಣ್ಣನೆ ನೀರು

ಅಜ್ಜನು ಕುಡಿವನು

ಬಿಸಿ ಬಿಸಿ ನೀರು

ಅಜ್ಜಿಯು ಕುಡಿವಳು

ಮಜ್ಜಿಗೆ ನೀರು

ನನಗೂ ಅಪ್ಪಗೂ

ಸಿಹಿ ಎಳನೀರು !

***

ಆಮೆ

ಆಮೆ ನೋಡಿರಿ ಆಮೆ

ಚಿಪ್ಪಿನ ಚೆಂದದ ಆಮೆ

ಗಟ್ಟಿ ಚಿಪ್ಪಿನ ಆಮೆ

ಮೆಲ್ಲನೆ ನಡೆಯುವ ಆಮೆ

ನೀರಲಿ ಈಜುವ ಆಮೆ

ನೆಲದಲಿ ನಡೆಯುವ ಆಮೆ

ಆಮೆ ನೋಡಿರಿ ಆಮೆ

***

ಆನೆ

ಆನೆ ಬಂತು ಆನೆ

ದಪ್ಪ ಗಾತ್ರದ ಆನೆ

ದೊಡ್ಡ ಕಿವಿಯ ಆನೆ

ಸಣ್ಣ ಕಣ್ಣಿನ ಆನೆ

ಉದ್ದ ಸೊಂಡಿಲ ಆನೆ

ತುಂಡು ಬಾಲದ ಆನೆ

ಆನೆ ಆನೆ ಆನೆ

ದಪ್ಪ ಗಾತ್ರದ ಆನೆ

***