ತುಂತುರು ಮಳೆ

ಬಾನಿನಿಂದ ಭುವಿಗೆ ಬಂತು
ತುಂತುರು ಮಳೆ
ಪಚ್ಚೆ ಪೈರು ಬೆಳೆದು
ಇಳೆಗೆ ತುಂಬಿತು ಕಳೆ


ಹೊಳೆಯು ಉಕ್ಕಿ ಹರಿದು
ಬಂತು ಜೀವ ಕಳೆ
ನೀರ ಚಿಲುಮೆ ನೋಡಿ
ನೀನು ಸಂತಸ ತಳೆ


ಹೊಲವ ರೈತ ಉತ್ತು
ಬಿತ್ತಿ ಬೆಳೆದನು ಬೆಳೆ
ಕಣಜ ಧಾನ್ಯದಿಂದ ತುಂಬಿ
ಹರುಷವಾಯ್ತು ನೆಲೆ

ಎಂಥ ಸಮಯ ..

ಅರಳಿದ ಹೂಗಳ

ಪರಿಮಳ ಸವಿಯಲು

ಆಹಾ ! ಎಂಥ ಸಮಯವದು

ಮೆಲ್ಲನೆ ಚಂದಿರ

ಮೂಡುತ ಬರುವ

ಆಹಾ! ಸುಂದರ ನೋಟವದು

ಮಂದ ಪ್ರಕಾಶದಿ

ಬೆಳಗುವ ದೀಪವು

ಕತ್ತಲೆಯನು ತಾ ಕಳೆಯುವುದು

ಅಜ್ಜಿಯು ಹೇಳುವ

ಕಥೆಯನು ಕೇಳಲು

ಎನ್ನಯ ಮನವು ತವಕಿಪುದು .

ನಾನು ಬರಲೇ ?

ಹಾಡನು ಹಾಡುತ
ಮರದ ಮರೆಯಲಿ
ಕುಳಿತಿಹೆ ಏತಕೆ ಕೋಗಿಲೆಯೇ ?


ಮಾವಿನ ಚಿಗುರನು
ಮೆಲ್ಲುತ ಮೆಲ್ಲನೆ
ಹಾಡುವೆ ಕುಹೂ ಕುಹೂ ಕೋಗಿಲೆಯೇ ?


ನಾನು ಬರುವೆ
ಹಾಡಲು ಕಲಿಸು
ಹತ್ತಿರ ಬರುವೆಯ ಕೋಗಿಲೆಯೇ ?
***

ನಾಚಿದ ಚಂದಿರ ..

ಮೂಡಿದ ಸೂರ್ಯನು

ಮುಳುಗುವ ಸಮಯಕೆ

ಮಲ್ಲಿಗೆ ಹೂವು

ಅರಳುವ ಸಮಯಕೆ

ಹಕ್ಕಿಯು ಗೂಡನು

ಸೇರುವ ಸಮಯಕೆ

ದೇವರ ದೀಪ

ಉರಿಸುವ ಸಮಯಕೆ

ಸ್ನಾನವ ಮುಗಿಸಿ

ಸೇರುವ ಸಮಯಕೆ

ಭಜನೆಯ ಮಾಡಿ

ಹಾಡುವ ಸಮಯಕೆ

ಕಂದನು ಮೆಲ್ಲನೆ

ನಗುತಿಹ ಸಮಯಕೆ

ಚಂದಿರ ನಾಚಿ

ಸರಿದನು ಮರೆಗೆ

***

ದೋಸೆ

ಕಾವಲಿ ಮೇಲೆ

ಬಿಸಿ ಬಿಸಿ ದೋಸೆ

ನೋಡಿದ ಮೇಲೆ

ತಿನ್ನುವ ಆಸೆ

ಅಕ್ಕಿ ಉದ್ದು

ಹಾಕಿದ ದೋಸೆ

ಅಮ್ಮನು ಮಾಡಿದ

ಮಸಾಲೆ ದೋಸೆ

ತಿನ್ನಲು ರುಚಿಕರ

ಈರುಳ್ಳಿ ದೋಸೆ

ನೋಡಲು ಹಿತವದು

ಬಗೆ ಬಗೆ ದೋಸೆ

ಹಲವು ಕಣ್ಣಿನ

ಮೆತ್ತನೆ ದೋಸೆ

ತಿನ್ನುತ ಮುಗಿಸುವೆ

ದೋಸೆಯ ಆಸೆ !

ತಾರಾ ನಾಯಕ ...

ಮೋಡದ ಮರೆಯಲಿ
ಓಡುವ ಚಂದಿರ

ಕಣ್ಣ ಮುಚ್ಚಾಲೆ ಆಡುವೆಯ ?

ಮಲ್ಲಿಗೆ ಪರಿಮಳ
ಪಸರಿಪ ಸಮಯಕೆ
ಮೆಲ್ಲನೆ ಬಾನಲಿ ಮೂಡುವೆಯ?

ಬಾನಲಿ ಬೆಳ್ಳಿಯ
ಬೆಳಕನು ಬೀರುತ
ತಾರಾನಾಯಕ ನಗುತಿಹೆಯ ?

ಮಕ್ಕಳ ಮನದಲಿ
ಸಂತಸ ಉಕ್ಕಿಸಿ
ಮನಸಿಗೆ ಮುದವನು ನೀಡುವೆಯ?

***

ನೆಲ್ಲಿಕಾಯಿ

ಬೆಟ್ಟದ ಮೇಲಿನ ನೆಲ್ಲಿಕಾಯಿ

ಮರದಲಿ ತುಂಬಿಹ ನೆಲ್ಲಿಕಾಯಿ

ತಿನ್ನಲು ಹುಳಿ ಹುಳಿ ನೆಲ್ಲಿಕಾಯಿ

ನೀರನು ಕುಡಿಯೆ ಸಿಹಿಯದು ಬಾಯಿ

ಸೇರಿಸೆ ಉಪ್ಪನು ನೆಲ್ಲಿಕಾಯಿ

ಮಾಡುವಳಮ್ಮ ಉಪ್ಪಿನಕಾಯಿ

ರುಚಿಯನು ಹೆಚ್ಚಿಪ ನೆಲ್ಲಿಕಾಯಿ

ಪ್ರಕೃತಿ ಕಾಣಿಕೆ ನೆಲ್ಲಿ ಕಾಯಿ

***