ಬಾಲಕನೆ..

ಬಾನದೋ ಬೆಳಗಿತು ಕತ್ತಲೆಯೋಡಿತು

ಓ ಓ ಬಾಲಕನೆದ್ದೇಳು

ದಿನಮಣಿಯುದಿಸುತ ಮೇಲಕೆ ಬಂದನು

ಬೆಳಗಿನ ನಿದ್ದೆಯು ಬಲು ಹಾಳು

ದೂರದ ಹೊಲದಲಿ ನೇಗಿಲ ಯೋಗಿಯು

ದುಡಿಯುತಲಿರುವನು ಜನಕಾಗಿ

ಅಮ್ಮನು ದೇವರ ನಾಮವ ಸ್ಮರಿಸುತ

ಕದೆಯುತಲಿರುವಳು ಮೊಸರನ್ನು

ಆಲಸ್ಯವ ಬಿಡು ಚಾಪೆಯ ಮಡಚಿಡು

ಮೋರೆಯ ತೊಳೆವುದು ನೀನಿನ್ನು

ಈಶನ ಸ್ಮರಿಸುತ ಹಿರಿಯರ ನಮಿಸುತ

ಪಾಠಗಳೆಲ್ಲವನೋದುವುದು

ನಿತ್ಯವೂ ಮಿಂದು ಗಂಜಿಯನುಂಡು

ಸಮಯಕೆ ಶಾಲೆಗೆ ಹೋಗುವುದು

ಪುಸ್ತಕ ಸ್ಲೇಟು ಬೆಳ್ಳನೆ ಶರಟು

ಟೋಪಿಯನೇರಿಸುತನ್ದದಲಿ

ಬೀದಿಗಳಲ್ಲಿ ಬಲಬದಿಯಲ್ಲಿ

ನೆಟ್ಟನೆ ನಡೆವುದು ಶಿಸ್ತಿನಲಿ

ಆಟವ ಪಾಠವನೆಲ್ಲವನೋದಿ

ಜಾಣನಾಗು ಬಾಳಿನಲಿ

(ಕವಿ : ಸುಶೀಲಮ್ಮ ಎಂ. )

***