ನದಿ

ಕಲ ಕಲ ಸದ್ದನು

ಮಾಡುತ ಮೆಲ್ಲನೆ

ಹರಿಯುವ ಸುಂದರ ನದಿ

ನೀರವ ಕಾಡಿನ

ನಡುವೆ ಸಾಗುತ

ಸೇರುವೆ ಸಾಗರ ತುದಿ

ಸಾಗುವ ದಾರಿಗೆ

ವೇಗವ ಪಡೆಯುತ

ಧುಮ್ಮುಕ್ಕುವ ಝರಿ

ಲೋಕದ ಜನರ

ಜೀವನ ಬೆಳಗಲು

ಸಂಪದ ನೀಡುವ ನದಿ

ಪಾಪವ ಕಳೆಯೆ

ಸ್ನಾನವ ವಿರಚಿಸೆ

ಶುದ್ಧ ತೀರ್ಥವೀ ನದಿ

***

ಕುಂಬಳಕಾಯಿ

ದೊಡ್ಡ ದೊಡ್ಡ ಕುಂಬಳಕಾಯಿ

ಪೂಜೆಗೆ ಬೇಕು ಕುಂಬಳಕಾಯಿ

ಪಲ್ಯಕೆ ಬೇಕು ಕುಂಬಳಕಾಯಿ

ಮಜ್ಜಿಗೆ ಹುಳಿಗೆ ಕುಂಬಳಕಾಯಿ

ಅಜ್ಜನ ನೆನಪಿಗೆ ಕುಂಬಳಕಾಯಿ

ಅಜ್ಜಿಯ ತಿಥಿಗೆ ಕುಂಬಳಕಾಯಿ

ರುಚಿ ರುಚಿ ಹಲ್ವಕೆ ಕುಂಬಳಕಾಯಿ

ದೇಹದ ತಂಪಿಗೆ ಕುಂಬಳಕಾಯಿ

***

ವಿಮಾನ ..

ಗಗನದಿ ಹಾರುತ

ಸದ್ದನು ಮಾಡುತ

ಹೋಗುವ ಪುಟ್ಟ ವಿಮಾನ

ದೊಡ್ಡ ರೆಕ್ಕೆಯ

ಲೋಹದ ಹಕ್ಕಿಯೆ?

ಗಗನದಿ ಗಮಿಸುವ ವಿಮಾನ

ಊರಿಂದ ಊರಿಗೆ

ಕ್ಷಣದಲಿ ಸಾಗುವ

ಗಗನ ಗಾಮಿಯೆ ವಿಮಾನ

ದೇಶ ವಿದೇಶವ

ಸುತ್ತುತಾ ಬರಲು

ನೀ ಉಪಕಾರಿಯೇ ವಿಮಾನ

ಕಾಯುವೆ ನಾನು

ನಿನ್ನನು ಏರಲು

ಹಾರುವೆ ಮುಗಿಲೆಡೆ ವಿಮಾನ

***

ಚಕ್ಕುಲಿ..

ಚಕ್ಕುಲಿ ಚಕ್ಕುಲಿ

ಬಿಸಿ ಬಿಸಿ ಚಕ್ಕುಲಿ

ಅಮ್ಮನು ಮಾಡಿದ

ಗುಂಡನೆ ಚಕ್ಕುಲಿ

ಅಕ್ಕನು ಮಾಡಿದ

ಕಡ್ಡಿಯ ಚಕ್ಕುಲಿ

ಬಾಯಲಿ ಕರಗುವ

ಬೆಣ್ಣೆ ಚಕ್ಕುಲಿ

ಕೆಂಪಗೆ ಕರಿದ

ಗರಿ ಗರಿ ಚಕ್ಕುಲಿ

ಚಕ್ಕುಲಿ ಚಕ್ಕುಲಿ

ಬಿಸಿ ಬಿಸಿ ಚಕ್ಕುಲಿ

***

ಗಣಪನ ಹಬ್ಬ...

ಮಣ್ಣಿನ ಗಣಪನ

ವಿಗ್ರಹ ಮಾಡಿ

ಎತ್ತರ ಪೀಠದಿ ಕುಳ್ಳಿರಿಸಿ

ಬಗೆ ಬಗೆಯಲಿ

ಸಿಂಗರಿಸಿದ ಮಂಟಪ

ಅಂದದಿ ಊರಲಿ ಮೆರೆದಿರಲು

ಚಕ್ಕುಲಿ ಕಡುಬು

ಮೋದಕ ಪಾಯಸ

ಬಗೆಬಗೆ ಕಜ್ಜಾಯ ತಿನಿಸುಗಳು

ಕಬ್ಬು ಕಡಲೆ

ಅರಳು ಗರಿಕೆ

ಎಲ್ಲವ ಗಣಪನ ಮುಂದಿಡಲು

ಊರಿನ ಹಿರಿಯರು

ಕಿರಿಯರು ಗೆಳೆಯರು

ಮಾತೆಯರೆಲ್ಲ ಸೇರಿರಲು

ಹಾಡನು ಹಾಡಿ

ಆರತಿ ಬೆಳಗಿ

ಪೂಜೆಯ ಮಾಡಿ ಕೈಮುಗಿದು

ಸರತಿಯ ಸಾಲಲಿ

ಎಲ್ಲರು ನಿಲ್ಲಲು

ಪಂಚಕಜ್ಜಾಯ ವಿತರಿಸಲು

ವಿಧ ವಿಧ ಆಟವ

ಆಡುತ ಜನರು

ಮೋದದಿ ಎಲ್ಲ ಸೇರುತಲಿ

ಗಣಪನ ಹಬ್ಬಕೆ

ಊರಿಗೆ ಊರೇ

ಸಡಗರದಿಂದ ನೆರೆದಿತ್ತು

***

ಬೆಳವಣಿಗೆ..

ಹನಿ ಹನಿ ಸೇರಿ

ದೊಡ್ಡ ಶರಧಿಯಾಯಿತು

ಕಾಳು ಕಾಳು ಸೇರಿ

ದೊಡ್ಡ ಕಣಜವಾಯಿತು

ದಿನ ದಿನವು ಉಳಿಸೆ

ಹಣದ ಮೊತ್ತವಾಯಿತು

ದೀಪದಿಂದ ದೀಪ ಬೆಳಗಿ

ಬೆಳಕು ಹೆಚ್ಚಿತು

ದಿನಕ್ಕೊಂದು ವಿಷಯ ಕಲಿಯೆ

ಜ್ಞಾನ ಬೆಳೆಯಿತು .

***

ಜಾರುಬಂಡಿ

ಶಾಲೆಯ ಬದಿಯಲಿ

ಆಟದ ಬಯಲಲಿ

ಜಾರುಬಂಡಿಯ ಮಾಡಿಹರು

ಸಂಜೆಯ ವೇಳೆಗೆ

ಆಟದ ಸಮಯಕೆ

ಜಾರುವ ಆಟವನಾಡುವೆವು

ಗೆಳೆಯರು ನಾನೂ

ಬಂಡಿಯ ಮೇಲಕೆ

ಹತ್ತುತ ಜಾರುತಲಿರುತಿಹೆವು

ಆಡುತ ಕುಣಿಯುತ

ಪಾಠವ ಓದುತ

ಜಾಣರಾಗಿ ಬಾಳುವೆವು .

***