ಮಂಗಳ ಪದ್ಯ ...

ಜಲದಲಿ ಮತ್ಸ್ಯವತಾರನಿಗೆ

ಗಿರಿಯ ಬೆನ್ನಲಿ ಪೊತ್ತ ಕೂರ್ಮನಿಗೆ

ಧರೆಯನುದ್ಧರಿಸಿದ ವರಾಹವತಾರಗೆ

ತರಳನ ಕಾಯ್ದ ನರಸಿಂಹನಿಗೆ

ಭೂಮಿಯ ದಾನವ ಬೇಡಿದಗೆ

ಆ ಮಹಾ ಕ್ಷತ್ರಿಯರ ಗೆಲಿದವಗೆ

ರಾಮಚಂದಿರನೆಂಬ ದಶರಥ ಸುತನಿಗೆ

ಭಾಮೆಯರರಸ ಗೋಪಾಲನಿಗೆ

ಬತ್ತಲೆ ನಿಂತಿಹ ಬೌದ್ಧನಿಗೆ

ಅರ್ತಿಯಿ೦ದ ಹಯವೇರಿದ ಕಲ್ಕ್ಯನಿಗೆ

ಹತ್ತವತಾರದಿ ಭಕ್ತರ ಪೊರೆಯುವ

ಅಚ್ಚ್ಯುತ ಪುರಂದರ ವಿಠಲನಿಗೆ . ಮಂಗಳಂ

-ಪುರಂದರದಾಸರು

(ಶಾಲೆಯಲ್ಲಿ ಪ್ರತಿ ಶುಕ್ರವಾರ ನಡೆಯುತ್ತಿದ್ದ "ಭಜನೆ" ಯಲ್ಲಿ ಹಾಡುತ್ತಿದ್ದ ಮಂಗಳ ಪದ್ಯ )

***

ಎತ್ತಿನ ಗಾಡಿ ....

ಗಡ ಗಡ ಗಡ ಗಡ ಸದ್ದನು ಮಾಡಿ

ಬರುತಿದೆ ನೋಡಿ ಎತ್ತಿನ ಗಾಡಿ

ಎತ್ತುಗಳೆರಡನು ಮುಂದಕೆ ಹೂಡಿ

ಕೈಯಲಿ ಕೋಲನು ಹಿಡಿದರೆ ನೋಡಿ

ಎಳೆಯುತ ಗಾಡಿಯ ಮುಂದಕೆ ಓಡಿ

ತಲುಪಿಪ ಗುರಿಯ ತಾ ಜತೆಗೂಡಿ

ಹಿಗ್ಗನು ಕುಗ್ಗನು ಭಾಗವ ಮಾಡಿ

ಹೊರುವವು ನಮಗೆ ಸುಖವನು ನೀಡಿ

ಈ ಪರಿ ಗಾಡಿಯ ನೀತಿಯ ನೋಡಿ

ಲೋಕಕೆ ಪಾಠವ ಕಲಿಸುವ ಮೋಡಿ

****

ಕಾಡಿಗೆ ಹೋಗೋಣ .....

ತಂಪಿನ ಮರಗಳ

ಗುಂಪಿನ ಬಳಿಯ

ಕಾಡಿಗೆ ಹೋಗೋಣ .

ಬೆಳೆದ ಬಿದಿರ

ಮೆಳೆಗಳ ನೋಡುತ

ಆಟವನಾಡೋಣ

ಕಿಚ ಪಿಚ ಸದ್ದನು

ಮಾಡುವ ಹಕ್ಕಿಯ

ನೋಡೋಣ

ಕಾಡಲಿ ಸಿಗುವ

ಮಾವಿನ ಹಣ್ಣನು

ಹೆಕ್ಕುತ ಸವಿಯೋಣ

ಹಸಿರಿನ ಬನದ

ಅಂದವ ನೋಡಿ

ಪುಳಕಿತರಾಗೋಣ

***

ಪುಟ್ಟ ಇರುವೆ

ಪುಟ್ಟದೊಂದು ಇರುವೆ

ಹೆಕ್ಕಿ ಚೂರು ಸಕ್ಕರೆ

ಹೋಗುತಿದೆ ತನ್ನ ಮನೆಗೆ

ಪುಳಕದಿಂದ ಆ ಕಡೆ

ಇರುವೇಗೆಕೆ ಸಕ್ಕರೆ

ಅಷ್ಟೊಂದು ಅಕ್ಕರೆ

ಪುಟ್ಟ ಚೂರು ಸಿಕ್ಕರೆ

ಬಿಡದೆ ಒಯ್ವುದಾಕಡೆ ?

ಒಮ್ಮೆ ಅಮ್ಮ ಸಿಕ್ಕರೆ

ನನ್ನ ನೋಡಿ ನಕ್ಕರೆ

ಪ್ರಶ್ನೆ ಕೇಳಿ ಬಿಟ್ಟರೆ

ಕೊಡುವಳೇನು ಉತ್ತರ ?

***

ಗೂಡಿನೆಡೆಗೆ ತೆರಳುವ .....

ಹೊತ್ತು ಹೋಯಿತು ಕತ್ತಲಾಯಿತು

ದಿನಪನಸ್ತಕೆ ಪೋದನು

ದಿನದ ಕೆಲಸದ ದಣಿವ ನೀಗಲು

ಬಾರೆ ನಾವು ಹೋಗುವ

ಬೆಳಕು ಕಳೆದುದು ದಿನವು ಮುಗಿದುದು
ಮೆಲ್ಲ ಮನೆಯನು ಸೇರುವ

ಅಳುವ ಮಕ್ಕಳು ಕಾಯುತಿರುವರು

ಗೂಡಿನಲ್ಲಿ ಮೆಲ್ಲನೆ

ಗುಟಕ ನೀಡುತ ಹಸಿವ ನೀಗುತ

ಸುಖದ ನಿದ್ದೆಗೆ ಜಾರುವ

***

ಕೆರೆ ...

ಕೆರೆ ಕೆರೆ ನಮ್ಮ ಕೆರೆ

ಕುಡಿವ ನೀರು ಕೊಡುವ ಕೆರೆ

ದೇವರು ಸ್ನಾನ ಮಾಡುವ ಕೆರೆ

ಪುಟ್ಟ ಮೀನು ಇರುವ ಕೆರೆ

ದೊಡ್ಡ ಆಮೆ ಇರುವ ಕೆರೆ

ಸುತ್ತ ಮೆಟ್ಟಿಲು ಇರುವ ಕೆರೆ

ಕೆರೆ ಕೆರೆ ನಮ್ಮ ಕೆರೆ

ಊರಿಗೊಂದು ದೊಡ್ಡ ಕೆರೆ

ತಂಪು ನೀರು ಕೊಡುವ ಕೆರೆ

ನಮ್ಮ ನೆಚ್ಚಿನ ದೊಡ್ಡ ಕೆರೆ ..

***

ಪುಣ್ಯ ಕ್ಷೇತ್ರ ನೋಡಿದೆನು ....

ಪುಣ್ಯ ಕ್ಷೇತ್ರಕೆ ಹೋಗಿ

ನಾನು ಹರಕೆ ಮಂಡೆಯ

ನೀಡಿದೆನು

ಹರಿಯುವ ನದಿಯಲಿ ಸ್ನಾನವ

ಮಾಡಿ ದೇವರ ದರುಶನ
ಮಾಡಿದೆನು

ಸರತಿಯ ಸಾಲಲಿ ಮೊದಲಿಗನಾಗಿ

ಭೋಜನ ಶಾಲೆಯ

ಸೇರಿದೆನು

ಊಟವ ಮಾಡುತ ಕೈಗಳ

ತೊಳೆದು ಮೆಲ್ಲನೆ ಹೊರಗೆ

ಬಂದಿಹೆನು

ನಿಮ್ಮ ನಮ್ಮ ಎಲ್ಲರ

ದೇವನು ಪೊರೆಯಲಿ ಎಂದು

ಬೇಡಿದೆನು .

***