ನವನೀತ

ಗೆಳೆಯನಿಗೆ ಕರೆ

2011-05-17T16:04:00.000+05:30

ಮಾವಿನ ಮರದಲಿ
ಮೆರೆಯುವ ಹಣ್ಣನು
ಮುದದಲಿ ಮೆಲ್ಲುವ
ಬಾ ಗೆಳೆಯ

ಬೀಸುವ ಗಾಳಿಗೆ
ಬೀಳುವ ಹಣ್ಣನು
ಮೆಲ್ಲುತ ಸವಿಯುವ
ಬಾ ಗೆಳೆಯ

ಕಲ್ಲನು ಹೆಕ್ಕುತ
ಗೆಲ್ಲನು ನೋಡುತ
ಸರ್ರನೆ ಎಸೆಯುವ
ಬಾ ಗೆಳೆಯ

ಬೈಗಿನ ಹೊತ್ತಲಿ
ಬಯಲಿನ ಬದಿಯಲಿ
ಕಲೆಯುತ ಸವಿಯುವ
ಬಾ ಗೆಳೆಯ

***

ಗೆಜ್ಜೆ ಕಾಲು ಕುಣಿಸುತ್ತ ...

2011-03-07T14:23:00.000+05:30

ಗೆಜ್ಜೆ ಕಾಲು ಕುಣಿಸುತ್ತ

ಗಲುಕು ಗಲುಕು ಎನಿಸುತ್ತ

ಗಾಲಿ ಮೇಲೆ ಉರುಳುತ್ತ

ಬಾ ಬಾ ಬಸವಣ್ಣ

ಅತ್ತೆಯ ಮನೆಗೆ ಹೋಗೋಣ

ಅವರೇ ಕಾಳು ತಿನ್ನೋಣ

ಅಲ್ಲಿಂದಿಲ್ಲಿಗೆ ಓಡೋಣ

ಬಾ ಬಾ ಬಸವಣ್ಣ

ಅಜ್ಜನ ಮನೆಗೆ ಹೋಗೋಣ

ಗೋಲಿ ಬುಗರಿ ಆಡೋಣ

ಮೇಲೆ ಕೆಳಗೆ ಜಿಗಿಯೋಣ

ಬಾ ಬಾ ಬಸವಣ್ಣ

***

ಬೆಕ್ಕು

2010-10-03T15:26:00.000+05:30

ಎಲೆಲೆ ಬೆಕ್ಕೆ

ನಿನ್ನ ಸೊಕ್ಕೆ ಕಳ್ಳತನದಲಿ

ಹಿರಿದು ಮೊಸರು

ಬೆಣ್ಣೆ ಕದ್ದು ತಿಂಬೆ ಮುದದಲಿ

ಹುಲಿಯ ರೂಪ

ನಿನಗೆ ಇದ್ದರೇನು ವ್ಯರ್ಥವು

ಹುಲಿಯ ಹಾಗೆ

ಬಲುಮೆ ನಿನಗೆ ಇಲ್ಲ ಸತ್ಯವು

ಇಲಿಯ ಹಿಡಿದು

ಅದನು ಕೊಂದು ತಿಂದು ತೇಗುವೆ

ನಲವ ಹೊಂದಿ

ಮಿಯಾ೦ವ್ ಮಿಯಾ೦ವ್ ಎಂದು ಕೂಗುವೆ

-ಕೃಪೆ : ಗಿರಿಜಾ ಪಿ.

ಗಾಳಿಪಟ

2010-07-14T14:37:00.003+05:30

ಬಣ್ಣದ ಹಾಳೆಯ
ತೆಂಗಿನ ಕಡ್ಡಿಯ
ಉದ್ದನೆ ಬಾಲದ ಗಾಳಿಪಟ

ದಾರವ ಎಳೆದು
ಓಡುತ ಜಿಗಿದು
ಹಾರಿಸಿ ನಲಿಯಲು ಗಾಳಿಪಟ

ಮುಗಿಲನು ಚುಂಬಿಸಿ
ಗಿಡುಗನ ಅಂಜಿಸಿ
ಗಾಳಿಪಟವು ಹಾರುವುದು

ಬಾನಲಿ ಹಾರುತ
ಮೇಲಕೆ ಏರುತ
ಪಟ ಪಟ ಸದ್ದನು ಮಾಡುವುದು

***

ತುಂತುರು ಮಳೆ

2010-06-17T08:46:00.002+05:30

ಬಾನಿನಿಂದ ಭುವಿಗೆ ಬಂತು
ತುಂತುರು ಮಳೆ
ಪಚ್ಚೆ ಪೈರು ಬೆಳೆದು
ಇಳೆಗೆ ತುಂಬಿತು ಕಳೆ

ಹೊಳೆಯು ಉಕ್ಕಿ ಹರಿದು
ಬಂತು ಜೀವ ಕಳೆ
ನೀರ ಚಿಲುಮೆ ನೋಡಿ
ನೀನು ಸಂತಸ ತಳೆ

ಹೊಲವ ರೈತ ಉತ್ತು
ಬಿತ್ತಿ ಬೆಳೆದನು ಬೆಳೆ
ಕಣಜ ಧಾನ್ಯದಿಂದ ತುಂಬಿ
ಹರುಷವಾಯ್ತು ನೆಲೆ

ಎಂಥ ಸಮಯ ..

2010-06-02T15:31:00.002+05:30

ಅರಳಿದ ಹೂಗಳ

ಪರಿಮಳ ಸವಿಯಲು

ಆಹಾ ! ಎಂಥ ಸಮಯವದು

ಮೆಲ್ಲನೆ ಚಂದಿರ

ಮೂಡುತ ಬರುವ

ಆಹಾ! ಸುಂದರ ನೋಟವದು

ಮಂದ ಪ್ರಕಾಶದಿ

ಬೆಳಗುವ ದೀಪವು

ಕತ್ತಲೆಯನು ತಾ ಕಳೆಯುವುದು

ಅಜ್ಜಿಯು ಹೇಳುವ

ಕಥೆಯನು ಕೇಳಲು

ಎನ್ನಯ ಮನವು ತವಕಿಪುದು .

ನಾನು ಬರಲೇ ?

2010-05-29T19:13:00.003+05:30

ಹಾಡನು ಹಾಡುತ
ಮರದ ಮರೆಯಲಿ
ಕುಳಿತಿಹೆ ಏತಕೆ ಕೋಗಿಲೆಯೇ ?

ಮಾವಿನ ಚಿಗುರನು
ಮೆಲ್ಲುತ ಮೆಲ್ಲನೆ
ಹಾಡುವೆ ಕುಹೂ ಕುಹೂ ಕೋಗಿಲೆಯೇ ?

ನಾನು ಬರುವೆ
ಹಾಡಲು ಕಲಿಸು
ಹತ್ತಿರ ಬರುವೆಯ ಕೋಗಿಲೆಯೇ ?
***

ನಾಚಿದ ಚಂದಿರ ..

2010-03-17T14:12:00.003+05:30

ಮೂಡಿದ ಸೂರ್ಯನು

ಮುಳುಗುವ ಸಮಯಕೆ

ಮಲ್ಲಿಗೆ ಹೂವು

ಅರಳುವ ಸಮಯಕೆ

ಹಕ್ಕಿಯು ಗೂಡನು

ಸೇರುವ ಸಮಯಕೆ

ದೇವರ ದೀಪ

ಉರಿಸುವ ಸಮಯಕೆ

ಸ್ನಾನವ ಮುಗಿಸಿ

ಸೇರುವ ಸಮಯಕೆ

ಭಜನೆಯ ಮಾಡಿ

ಹಾಡುವ ಸಮಯಕೆ

ಕಂದನು ಮೆಲ್ಲನೆ

ನಗುತಿಹ ಸಮಯಕೆ

ಚಂದಿರ ನಾಚಿ

ಸರಿದನು ಮರೆಗೆ

***

ದೋಸೆ

2010-03-12T13:55:00.003+05:30

ಕಾವಲಿ ಮೇಲೆ

ಬಿಸಿ ಬಿಸಿ ದೋಸೆ

ನೋಡಿದ ಮೇಲೆ

ತಿನ್ನುವ ಆಸೆ

ಅಕ್ಕಿ ಉದ್ದು

ಹಾಕಿದ ದೋಸೆ

ಅಮ್ಮನು ಮಾಡಿದ

ಮಸಾಲೆ ದೋಸೆ

ತಿನ್ನಲು ರುಚಿಕರ

ಈರುಳ್ಳಿ ದೋಸೆ

ನೋಡಲು ಹಿತವದು

ಬಗೆ ಬಗೆ ದೋಸೆ

ಹಲವು ಕಣ್ಣಿನ

ಮೆತ್ತನೆ ದೋಸೆ

ತಿನ್ನುತ ಮುಗಿಸುವೆ

ದೋಸೆಯ ಆಸೆ !

ತಾರಾ ನಾಯಕ ...

2010-01-30T10:28:00.003+05:30

ಮೋಡದ ಮರೆಯಲಿ
ಓಡುವ ಚಂದಿರ

ಕಣ್ಣ ಮುಚ್ಚಾಲೆ ಆಡುವೆಯ ?

ಮಲ್ಲಿಗೆ ಪರಿಮಳ
ಪಸರಿಪ ಸಮಯಕೆ
ಮೆಲ್ಲನೆ ಬಾನಲಿ ಮೂಡುವೆಯ?

ಬಾನಲಿ ಬೆಳ್ಳಿಯ
ಬೆಳಕನು ಬೀರುತ
ತಾರಾನಾಯಕ ನಗುತಿಹೆಯ ?

ಮಕ್ಕಳ ಮನದಲಿ
ಸಂತಸ ಉಕ್ಕಿಸಿ
ಮನಸಿಗೆ ಮುದವನು ನೀಡುವೆಯ?

***

ನೆಲ್ಲಿಕಾಯಿ

2010-01-04T17:55:00.001+05:30

ಬೆಟ್ಟದ ಮೇಲಿನ ನೆಲ್ಲಿಕಾಯಿ

ಮರದಲಿ ತುಂಬಿಹ ನೆಲ್ಲಿಕಾಯಿ

ತಿನ್ನಲು ಹುಳಿ ಹುಳಿ ನೆಲ್ಲಿಕಾಯಿ

ನೀರನು ಕುಡಿಯೆ ಸಿಹಿಯದು ಬಾಯಿ

ಸೇರಿಸೆ ಉಪ್ಪನು ನೆಲ್ಲಿಕಾಯಿ

ಮಾಡುವಳಮ್ಮ ಉಪ್ಪಿನಕಾಯಿ

ರುಚಿಯನು ಹೆಚ್ಚಿಪ ನೆಲ್ಲಿಕಾಯಿ

ಪ್ರಕೃತಿ ಕಾಣಿಕೆ ನೆಲ್ಲಿ ಕಾಯಿ

***

ಕನ್ನಡ ನಾಡು

2009-12-14T14:46:00.003+05:30

ಚಿನ್ನದ ನಾಡು ಗಂಧದ ಬೀಡು

ಜೇನಿನ ಗೂಡಿದು ಕನ್ನಡವು

ಸುಂದರ ವನಗಳ ಚೆಂದದ ಹೊಲಗಳ

ಚೆಲುವಿನ ನಾಡಿದು ಕನ್ನಡವು

ಜುಳು ಜುಳು ಹರಿಯುವ ತೊರೆಗಳ ಕಲರವ

ಮೊರೆಯುವ ನಾಡಿದು ಕನ್ನಡವು

ತೆಂಗು ಕಂಗು ಬಾಳೆ ತಾಳೆಗಳ

ತೋಟದ ಸೊಬಗಿನ ಕನ್ನಡವು

ನವಿಲಿನ ನರ್ತನ ಕೋಗಿಲೆ ಕೂಜನ

ಶುಕಧ್ವನಿ ಮೊಳಗಿದ ಕನ್ನಡವು

ಕಪಿಗಳ ದಂಡು ಆನೆಯ ಹಿಂಡು

ಖಗ ಮೃಗ ತಳಕಿನ ಕನ್ನಡವು

ರಾಜಾಧಿರಾಜರು ಆಳಿದ ನಾಡು

ವೈಭವ ಮೆರೆದಿಹ ಕನ್ನಡವು

ಕವಿ ಪುಂಗವರು ಬಾಳಿದ ನಾಡು

ಸಾಹಿತ್ಯ ಸ್ಪೂರ್ತಿಯ ಕನ್ನಡವು

ಸಂಸ್ಕೃತಿ ಕಲೆಗಳು ತುಳುಕಿದ ನಾಡು

ಸುಖ ಶಾಂತಿ ನೆಲೆಸಿದ ಕನ್ನಡವು

ಶರಣರು ಸಂತರು ಬದುಕಿದ ನಾಡು

ಪುಣ್ಯ ಭೂಮಿಯಿದು ಕನ್ನಡವು

-ಆರ್. ಎಸ . ಚಾಪಗಾವಿ

ಬಾಲನ ಕರೆ ....

2009-12-08T21:34:00.003+05:30

ಮೂಡಿದ ರವಿಯು

ಮುಳುಗುವ ಸಮಯಕೆ

ಗೂಡನು ಸೇರುವ ಹಕ್ಕಿಗಳೇ

ದಿನವಿಡೀ ಕಾಡಲಿ

ನಾಡಲಿ ಹಾರುತ

ಕಾಳನು ಅರಸುವ ಹಕ್ಕಿಗಳೇ

ವಿಧ ವಿಧ ಬಣ್ಣದಿ

ಮಧುರ ಸ್ವರದಲಿ

ಚಿಲಿ ಪಿಲಿಗುಟ್ಟುವ ಹಕ್ಕಿಗಳೇ

ಸಂಜೆಯ ಹೊತ್ತಲಿ

ನಿಮ್ಮೊಡನಾಡಲು

ಬರುತಿಹೆ ನಾನು ಹಕ್ಕಿಗಳೇ

***

ಸೂರ್ಯನಿಗೆ ನಮನ

2009-12-04T21:24:00.004+05:30

ಸಹಸ್ರ ರಶ್ಮಿಯನು ಬೀರುವ

ಜಗದ ಕರ್ಮದ ಸಾಕ್ಷಿಯೇ

ತೇಜೋಮಯ ಪ್ರದೀಪ ನಿನ್ನಯ

ಚರಣಕನುದಿನ ನಮಿಸುವೆ

ಪುಂಜ ಪುಂಜದಿ ಬೆಳಕನೀಯುತ

ಮೂಡು ದಿಕ್ಕಲಿ ಮೂಡುವೆ

ಮತ್ತೆ ಏರುತ ಪ್ರಖರನಾಗುತ

ಭೂಮಿಯನ್ನು ಬೆಳಗುವೆ

ಹೊನ್ನ ಬಣ್ಣದ ಕಿರಣವೀಯುತ

ಮೋಡದೆಡೆಯಲಿ ಅಡಗುವೆ

ಮತ್ತೆ ಸಂಜೆಯ ತಂಪು ಕಂಪಲಿ

ಶರಧಿಯಾಚೆಗೆ ಇಳಿಯುವೆ

ಸಸ್ಯ ಪ್ರಾಣಿ ಸಂಕುಲವನೆಲ್ಲವ

ಕಾಲ ಕಾಲಕೆ ಬೆಳೆಸುವೆ

ಜಗದ ಜೀವಕೆ ಆರೋಗ್ಯ ಭಾಗ್ಯವ

ಕೊಡುವ ನಿನಗೆ ನಮಿಸುವೆ .

ಚಂದಿರ ಬಾ ಬಾರೋ ..

2009-11-19T10:19:00.004+05:30

ಮಾಮರದೆಡೆಯಲಿ

ಮೋಡದ ಮರೆಯಲಿ

ಚಲಿಸುವ ಚಂದಿರ ಬಾ ಬಾರೋ

ತಿಂಗಳ ಬೆಳಕಿನ

ತಂಪಿನ ಕಿರಣವ

ಬೀರುವ ಚಂದಿರ ಬಾ ಬಾರೋ

ಹೂವಿನ ಪರಿಮಳ

ತಣ್ಣನೆ ಗಾಳಿಯ

ಜೊತೆ ಸೇರುತ ನೀ ಬಾ ಬಾರೋ

ಅಮ್ಮನ ಜೊತೆಗೆ

ಹಾಡನು ಹಾಡುತ

ಕಾಯುವೆ ನಿನಗೆ ಬಾ ಬಾರೋ

***

ಉದಯವಾಗಲಿ

2009-11-10T14:36:00.001+05:30

ಉದಯವಾಗಲಿ ನಮ್ಮ ಚೆಲುವ ಕನ್ನಡನಾಡು

ಬದುಕು ಬಲುಹಿನ ನಿಧಿಯು ಸದಭಿಮಾನದ ಗೂಡು.

ರಾಜನ್ಯರಿಪು ಪರಶುರಾಮನಮ್ಮನ ನಾಡು

ಆ ಜಲಧಿಯನೆ ಜಿಗಿದ ಹನುಮನುದಿಸಿದ ನಾಡು

ಓಜೆಯಿಂ ಮೆರೆದರಸುಗಳ ಸಾಹಸದ ಸೂಡು

ತೇಜವನು ನಮಗೀವ ವೀರವೃಂದದ ಬೀಡು.

ಲೆಕ್ಕಿಗಮಿತಾಕ್ಷರರು ಬೆಳೆದು ಮೆರೆದಿಹ ನಾಡು

ಜಕ್ಕಣನ ಶಿಲ್ಪಕಲೆಯಚ್ಚರಿಯ ಕರುಗೋಡು

ಚೊಕ್ಕಮತಗಳ ಸಾರಿದವರಿಗಿದು ನೆಲೆವೀಡು

ಬೊಕ್ಕಸದ ಕಣಜವೈ ವಿದ್ವತ್ತೆಗಳ ಕಾಡು.

ಪಾವನೆಯರಾ ಕೃಷ್ಣೆ ಭೀಮೆಯರ ತಾಯ್ನಾಡು

ಕಾವೇರಿ ಗೋದೆಯರು ಮೈದೊಳೆವ ನಲುನಾಡು

ಆವಗಂ ಸ್ಪೂರ್ತಿಸುವ ಕಬ್ಬಿಗರ ನಡೆಮಾಡು

ಕಾವ ಗದುಗಿನ ವೀರನಾರಾಯಣನ ಬೀಡು.

ಕವಿ : ಹುಯಿಲಗೋಳ ನಾರಾಯಣರಾಯರು

ನದಿ

2009-10-14T18:31:00.008+05:30

ಕಲ ಕಲ ಸದ್ದನು

ಮಾಡುತ ಮೆಲ್ಲನೆ

ಹರಿಯುವ ಸುಂದರ ನದಿ

ನೀರವ ಕಾಡಿನ

ನಡುವೆ ಸಾಗುತ

ಸೇರುವೆ ಸಾಗರ ತುದಿ

ಸಾಗುವ ದಾರಿಗೆ

ವೇಗವ ಪಡೆಯುತ

ಧುಮ್ಮುಕ್ಕುವ ಝರಿ

ಲೋಕದ ಜನರ

ಜೀವನ ಬೆಳಗಲು

ಸಂಪದ ನೀಡುವ ನದಿ

ಪಾಪವ ಕಳೆಯೆ

ಸ್ನಾನವ ವಿರಚಿಸೆ

ಶುದ್ಧ ತೀರ್ಥವೀ ನದಿ

***

ಕುಂಬಳಕಾಯಿ

2009-09-29T14:29:00.003+05:30

ದೊಡ್ಡ ದೊಡ್ಡ ಕುಂಬಳಕಾಯಿ

ಪೂಜೆಗೆ ಬೇಕು ಕುಂಬಳಕಾಯಿ

ಪಲ್ಯಕೆ ಬೇಕು ಕುಂಬಳಕಾಯಿ

ಮಜ್ಜಿಗೆ ಹುಳಿಗೆ ಕುಂಬಳಕಾಯಿ

ಅಜ್ಜನ ನೆನಪಿಗೆ ಕುಂಬಳಕಾಯಿ

ಅಜ್ಜಿಯ ತಿಥಿಗೆ ಕುಂಬಳಕಾಯಿ

ರುಚಿ ರುಚಿ ಹಲ್ವಕೆ ಕುಂಬಳಕಾಯಿ

ದೇಹದ ತಂಪಿಗೆ ಕುಂಬಳಕಾಯಿ

***

ವಿಮಾನ ..

2009-09-07T10:51:00.004+05:30

ಗಗನದಿ ಹಾರುತ

ಸದ್ದನು ಮಾಡುತ

ಹೋಗುವ ಪುಟ್ಟ ವಿಮಾನ

ದೊಡ್ಡ ರೆಕ್ಕೆಯ

ಲೋಹದ ಹಕ್ಕಿಯೆ?

ಗಗನದಿ ಗಮಿಸುವ ವಿಮಾನ

ಊರಿಂದ ಊರಿಗೆ

ಕ್ಷಣದಲಿ ಸಾಗುವ

ಗಗನ ಗಾಮಿಯೆ ವಿಮಾನ

ದೇಶ ವಿದೇಶವ

ಸುತ್ತುತಾ ಬರಲು

ನೀ ಉಪಕಾರಿಯೇ ವಿಮಾನ

ಕಾಯುವೆ ನಾನು

ನಿನ್ನನು ಏರಲು

ಹಾರುವೆ ಮುಗಿಲೆಡೆ ವಿಮಾನ

***

ಚಕ್ಕುಲಿ..

2009-08-26T09:35:00.002+05:30

ಚಕ್ಕುಲಿ ಚಕ್ಕುಲಿ

ಬಿಸಿ ಬಿಸಿ ಚಕ್ಕುಲಿ

ಅಮ್ಮನು ಮಾಡಿದ

ಗುಂಡನೆ ಚಕ್ಕುಲಿ

ಅಕ್ಕನು ಮಾಡಿದ

ಕಡ್ಡಿಯ ಚಕ್ಕುಲಿ

ಬಾಯಲಿ ಕರಗುವ

ಬೆಣ್ಣೆ ಚಕ್ಕುಲಿ

ಕೆಂಪಗೆ ಕರಿದ

ಗರಿ ಗರಿ ಚಕ್ಕುಲಿ

ಚಕ್ಕುಲಿ ಚಕ್ಕುಲಿ

ಬಿಸಿ ಬಿಸಿ ಚಕ್ಕುಲಿ

***

ಗಣಪನ ಹಬ್ಬ...

2009-08-25T12:11:00.005+05:30

ಮಣ್ಣಿನ ಗಣಪನ

ವಿಗ್ರಹ ಮಾಡಿ

ಎತ್ತರ ಪೀಠದಿ ಕುಳ್ಳಿರಿಸಿ

ಬಗೆ ಬಗೆಯಲಿ

ಸಿಂಗರಿಸಿದ ಮಂಟಪ

ಅಂದದಿ ಊರಲಿ ಮೆರೆದಿರಲು

ಚಕ್ಕುಲಿ ಕಡುಬು

ಮೋದಕ ಪಾಯಸ

ಬಗೆಬಗೆ ಕಜ್ಜಾಯ ತಿನಿಸುಗಳು

ಕಬ್ಬು ಕಡಲೆ

ಅರಳು ಗರಿಕೆ

ಎಲ್ಲವ ಗಣಪನ ಮುಂದಿಡಲು

ಊರಿನ ಹಿರಿಯರು

ಕಿರಿಯರು ಗೆಳೆಯರು

ಮಾತೆಯರೆಲ್ಲ ಸೇರಿರಲು

ಹಾಡನು ಹಾಡಿ

ಆರತಿ ಬೆಳಗಿ

ಪೂಜೆಯ ಮಾಡಿ ಕೈಮುಗಿದು

ಸರತಿಯ ಸಾಲಲಿ

ಎಲ್ಲರು ನಿಲ್ಲಲು

ಪಂಚಕಜ್ಜಾಯ ವಿತರಿಸಲು

ವಿಧ ವಿಧ ಆಟವ

ಆಡುತ ಜನರು

ಮೋದದಿ ಎಲ್ಲ ಸೇರುತಲಿ

ಗಣಪನ ಹಬ್ಬಕೆ

ಊರಿಗೆ ಊರೇ

ಸಡಗರದಿಂದ ನೆರೆದಿತ್ತು

***

ಬೆಳವಣಿಗೆ..

2009-08-20T13:44:00.003+05:30

ಹನಿ ಹನಿ ಸೇರಿ

ದೊಡ್ಡ ಶರಧಿಯಾಯಿತು

ಕಾಳು ಕಾಳು ಸೇರಿ

ದೊಡ್ಡ ಕಣಜವಾಯಿತು

ದಿನ ದಿನವು ಉಳಿಸೆ

ಹಣದ ಮೊತ್ತವಾಯಿತು

ದೀಪದಿಂದ ದೀಪ ಬೆಳಗಿ

ಬೆಳಕು ಹೆಚ್ಚಿತು

ದಿನಕ್ಕೊಂದು ವಿಷಯ ಕಲಿಯೆ

ಜ್ಞಾನ ಬೆಳೆಯಿತು .

***

ಜಾರುಬಂಡಿ

2009-08-12T09:24:00.004+05:30

ಶಾಲೆಯ ಬದಿಯಲಿ

ಆಟದ ಬಯಲಲಿ

ಜಾರುಬಂಡಿಯ ಮಾಡಿಹರು

ಸಂಜೆಯ ವೇಳೆಗೆ

ಆಟದ ಸಮಯಕೆ

ಜಾರುವ ಆಟವನಾಡುವೆವು

ಗೆಳೆಯರು ನಾನೂ

ಬಂಡಿಯ ಮೇಲಕೆ

ಹತ್ತುತ ಜಾರುತಲಿರುತಿಹೆವು

ಆಡುತ ಕುಣಿಯುತ

ಪಾಠವ ಓದುತ

ಜಾಣರಾಗಿ ಬಾಳುವೆವು .

***

ಹಣ್ಣು ..

2009-08-11T09:37:00.007+05:30

ರುಚಿ ರುಚಿ ರುಚಿಯ

ಕಿತ್ತಳೆ ಹಣ್ಣು

ಮರದಲಿ ಬೆಳೆಯುವ

ಮಾವಿನ ಹಣ್ಣು

ಗೊಂಚಲು ಗೊಂಚಲು

ದ್ರಾಕ್ಷಿಯ ಹಣ್ಣು

ಉದ್ದನೆ ಗೊನೆಯ

ಬಾಳೆಯ ಹಣ್ಣು

ಪುಟ್ಟನೆ ಗಿಡದಲಿ
ಪೇರಳೆ ಹಣ್ಣು

ನಾಲಿಗೆ ಹಿತಕೆ

ನೇರಳೆ ಹಣ್ಣು

ಗಟ್ಟಿ ದೇಹಕೆ

ಹಲಸಿನ ಹಣ್ಣು

ದಿನ ದಿನ ಸವಿಯುವ

ಒಳ್ಳೆಯ ಹಣ್ಣು

***

ಜೋಕಾಲಿ ..

2009-08-10T14:21:00.002+05:30

ಆಲದ ಮರದ
ಬೀಳಲು ಹಿಡಿದು
ಜೋಕಾಲಿಯಾಡುವ ಬಾರಣ್ಣ

ಸರತಿಯ ಸಾಲಲಿ
ನಿಲ್ಲುತ ನಾವು
ಜೋಕಾಲಿ ಜೀಕುವ ಬಾರಣ್ಣ

ಅಮ್ಮನು ಕೊಟ್ಟಿಹ
ಕಡಲೆ ಮಿಠಾಯಿ
ಹಂಚುತ ತಿನ್ನುವ ಬಾರಣ್ಣ

ಸಂಜೆಯ ಹೊತ್ತು
ಮನೆಯನು ಸೇರುತ
ದೀವಪ ಬೆಳಗುವ ಬಾರಣ್ಣ
***

ನರಿರಾಯ ...

2009-08-09T10:24:00.002+05:30

ಮೇಲಕೆ ನೀನು

ನೋಡುತ ಏನು

ಹೊಂಚನು ಹಾಕುವೆ ನರಿರಾಯ ?

ಬಾನಲಿ ಹಾರುವ

ಹಕ್ಕಿಯ ಹಿಡಿಯುವ

ಯೋಚನೆ ನಿನ್ನದೆ ನರಿರಾಯ ?

ದ್ರಾಕ್ಷಿಯ ತೋಟದಿ

ಬಿಟ್ಟಿಹ ಹಣ್ಣನು

ಪಡೆಯಲು ಸೋತೆಯ ನರಿರಾಯ ?

ಹಾರುವ ಹಕ್ಕಿಯ

ಹಿಡಿಯಲು ನಿನಗೆ

ದಾರಿಯು ಹೊಳೆಯಿತೆ ನರಿರಾಯ ?

***

ಬಾವಲಿ

2009-08-07T09:49:00.002+05:30

ಹಣ್ಣನು ಹುಡುಕುತ

ಹಾರುತ ಬರುವ

ದೊಡ್ಡ ರೆಕ್ಕೆಯ ಬಾವಲಿಯೇ

ರಾತ್ರಿಯ ಹೊತ್ತಲಿ

ವೇಗದಿ ಹಾರುತ

ಏನು ನಿನಗೆ ಗಲಿಬಿಲಿಯೇ ?

ಹಗಲು ಹೊತ್ತಲಿ

ಮರದಲಿ ಜೋಲುವೆ

ಗುಂಪಿನೊಳೇಕೆ ವಾಸಿಸುವೆ ?

ಬಾ ಬಾ ಬಾವಲಿ

ನಿನ್ನನು ನೋಡಿ

ಚಿತ್ರವ ನಾನು ಬಿಡಿಸುವೆ

ಓಡದೆ ನೀನು

ಇದ್ದರೆ ಒಂದೆಡೆ

ಹಣ್ಣನು ನಾನು ತಿನ್ನಿಸುವೆ !

***

ಅಕ್ಕನ ಮದುವೆ...

2009-07-29T14:46:00.003+05:30

ಅಕ್ಕನ ಮದುವೆಗೆ

ಭಾರೀ ದಿಬ್ಬಣ

ಬೆಳಗ್ಗೆ ಬಂದಿತ್ತು

ತಮ್ಮನ ಕೂಡೆ

ಪುಟ್ಟನ ಸ್ವಾಗತ

ಭರ್ಜರಿ ನಡೆದಿತ್ತು

ಬ್ಯಾಂಡು ವಾಲಗ

ಸಂಭ್ರಮ ಸಡಗರ

ಚಪ್ಪರದೊಳಗಿತ್ತು

ಮಂಟಪ ತುಂಬ

ಹೂವಿನ ಪರಿಮಳ

ಮೆಲ್ಲನೆ ಹರಡಿತ್ತು

ಭಾವನು ಬಂದು

ಅಕ್ಕನ ಕೈಯ್ಯನು

ಹಿಡಿದೇ ಆಗಿತ್ತು

ಅಡುಗೆ ಭಟ್ಟರು

ಹಪ್ಪಳ ಹುರಿವ

ತಯಾರಿ ನಡೆದಿತ್ತು

ಎಲ್ಲರು ಕುಳಿತು

ಊಟವ ಮುಗಿಸಲು

ಮದುವೆ ಮುಗಿದಿತ್ತು .

***

ಇಲಿರಾಯ ...

2009-07-27T19:09:00.004+05:30

ಮನೆಯ ಬಿಲದಲಿ

ವಾಸವ ಮಾಡುವ

ಉದ್ದನೆ ಬಾಲದ ಇಲಿರಾಯ

ತಿಂಡಿಯ ನಾನು

ಎಲ್ಲೇ ಇಟ್ಟರೂ

ರುಚಿಯನು ನೋಡುವ ಇಲಿರಾಯ !

ಮಕ್ಕಳು ಮರಿಗಳು

ಎಲ್ಲರ ಸೇರಿಸಿ

ಗುಲ್ಲನು ಎಬ್ಬಿಸೋ ಇಲಿರಾಯ

ವರ್ಷಕ್ಕೊಮ್ಮೆ ಬಂದರೆ

ನಿನ್ನನು ಚೌತಿಗೆ ಪೂಜಿಸುವೆ

ದಿನವೂ ಬಂದರೆ ಓಡಿಸುವೆ !

***

ಬಾಲ ಗೋಪಾಲ ...

2009-07-13T09:41:00.003+05:30

ಬಾಲ ಗೋಪಾಲ ಸದಾನಂದ

ಹಾಲ ಕೊಡುವೆ ಬಾ ಗೋವಿಂದ

ಬೆಣ್ಣೆಯಿದೆ ತಕೋ ಯದುಚಂದ್ರ

ಹಣ್ಣು೦ಟಿಲ್ಲಿಯೆ ಗುಣಸಾಂದ್ರ

ಚಿನ್ನದ ಕೊಳಲಿದೆ ಬಾರಯ್ಯ

ಇನ್ನಾದರು ದಯ ತೋರಯ್ಯ

ಬಾಲ ಗೋಪಾಲ ಸದಾನಂದ
ಹಾಲ ಕೊಡುವೆ ಬಾ ಗೋವಿಂದ

***

(ನನ್ನ ಅಮ್ಮ ಮಕ್ಕಳನ್ನು ತೊಟ್ಟಿಲಲ್ಲಿ ತೂಗುವಾಗ ಹೇಳುತ್ತಿದ್ದ ಪದ್ಯ )

ಮೊಲದ ಮರಿ ..

2009-07-11T10:23:00.004+05:30

ಪೊದರಿನ ಬಳಿಯಲಿ

ಆಡುತಲಿರುವ ಮುದ್ದಿನ

ಮೊಲದ ಮರಿ

ಚಿಗುರೆಲೆ ಮೆಲ್ಲುತ

ಕಿವಿಯನು ನಿಮಿರಿಸಿ

ನೋಡುವುದೇಕೀ ಪರಿ ?

ಅಮ್ಮನ ಕೂಡುತ

ತಮ್ಮನ ಸೇರುತ

ಆಡಲು ಬರಲೇ ನಾನು?

ಕಾಡಿನ ಬಳಿಗೆ

ಓಡದೆ ನೀನು

ನನ್ನೊಡನಾಡುವೆಯೇನು ?

***

ಹಣತೆ ...

2009-07-09T21:44:00.002+05:30

ಸುತ್ತಲ ಕತ್ತಲೆ

ಕಳೆಯುತ ಬೆಳಕನು

ನೀಡುವ ಪುಟ್ಟ ಹಣತೆ

ಮಂದ ಪ್ರಕಾಶವ

ಬೀರುತ ನಿಂತಿಹೆ

ಸರತಿಯ ಸಾಲಿನಲೇಕೆ ?

ಚಂದಿರನಿರದ ರಾತ್ರಿಯ

ತುಂಬ ನಿನ್ನ

ಪ್ರಕಾಶವು ಸಾಕೆ ?

ನಿನ್ನಯ ಬಿಂಬವ

ನೋಡುತ ನಾನು

ಬರೆಯಲೇ ಒಂದು ಕವಿತೆ ?

***

ಅಜ್ಜನ ಮೀಸೆ ...

2009-07-06T21:37:00.002+05:30

ಬೆಳ್ಳನೆ ಹತ್ತಿಯ

ಹೊಸೆದು ತೀಡಿದ

ಬತ್ತಿಯಂತೆ ಕಾಣುವುದು

ಮುದ್ದಿನ ಅಜ್ಜನ

ಮುಖದ ಮೇಲಿನ

ಬೆಳ್ಳನೆ ಮೀಸೆ ಹೊಳೆಯುವುದು

ಅಜ್ಜಿಗೆ ಭೀತಿ

ಅಜ್ಜಗೆ ಪ್ರೀತಿ

ಮುದ್ದಿನ ಮೀಸೆ ಬೆಳೆಯುವುದು

ಮೀಸೆಯ ಹೊತ್ತು

ನೆಟ್ಟನೆ ನಡೆಯುವ

ಅಜ್ಜನ ಆಸೆ ಫಲಿಸುವುದು !

***

ನನ್ನಪ್ಪ ....

2009-06-21T11:10:00.005+05:30

ಅಪ್ಪ ಅಪ್ಪ ನನ್ನಪ್ಪ

ಮುದ್ದು ಮಾಡುವ ನನ್ನಪ್ಪ

ವಿದ್ಯೆಯ ಕಲಿಸಿದ ನನ್ನಪ್ಪ

ಬುದ್ದಿಯ ಪೇಳಿದ ನನ್ನಪ್ಪ

ಶಿಸ್ತು ಕಲಿಸಿದ ನನ್ನಪ್ಪ

ಕಷ್ಟವ ಸಹಿಸಿದ ನನ್ನಪ್ಪ

ಜೀವನ ಸ್ಫೂರ್ತಿ ನನ್ನಪ್ಪ

ಭಾವ ಜೀವಿ ನನ್ನಪ್ಪ

***

ಹುಲಿ ಬಂತು ಹುಲಿ..

2009-06-19T09:18:00.002+05:30

ಹುಲಿ ಬಂತು ಹುಲಿ

ದೊಡ್ಡ ಪಟ್ಟೆ ಹುಲಿ

ಬೇಟೆಯಾಡಿ ಹಸಿವು
ಕಳೆದು ಬಂದಿತೀಗ ಹುಲಿ

ಕಾಡಿನಿಂದ ಹೊರಗೆ

ಬಂದು ನಿಂದಿತೀಗ ಹುಲಿ

ಶಿಸ್ತಿನಿಂದ ಇರುವ ಕಲೆಯ

ಇದನು ನೋಡಿ ಕಲಿ

***

ಜಿಂಕೆ ಮರಿ ...

2009-06-18T09:25:00.002+05:30

ಪುಟ್ಟ ಪುಟ್ಟ
ಹೆಜ್ಜೆ ಇಟ್ಟು
ಬರುವ ಜಿಂಕೆ ಮರಿ

ಮೈಯ ತುಂಬ
ಚುಕ್ಕೆ ಇರುವ
ಪುಟ್ಟ ಜಿಂಕೆ ಮರಿ

ಎಲೆಯ ಚಿಗುರ
ಸವಿದು ಮೆಲುವ
ಮುದ್ದು ಜಿಂಕೆ ಮರಿ

ಕುಣಿದು ನಲಿದು
ಅಮ್ಮನೊಡನೆ ಬರುವ
ಜಾಣ ಮರಿ
***

ಆನೆ ಬಂತಣ್ಣ ...

2009-06-17T11:25:00.003+05:30

ಆನೆ ಬಂತಣ್ಣ

ನಮ್ಮೂರಿಗೆ

ಆನೆ ಬಂತಣ್ಣ

ಪುಟ್ಟ ಕಣ್ಣಿನ

ಮೋಟು ಬಾಲದ

ಆನೆ ಬಂತಣ್ಣ

ಮೊರದ ಕಿವಿಯ

ನೀಳ ಸೊಂಡಿಲ

ಆನೆ ಬಂತಣ್ಣ

ದಪ್ಪನೆ ದೇಹದ

ಉದ್ದನೆ ದಂತದ

ಆನೆ ಬಂತಣ್ಣ

ಆನೆ ಬಂತಣ್ಣ
ನಮ್ಮೂರಿಗೆ
ಆನೆ ಬಂತಣ್ಣ

***

ಮಳೆ ಬಂತು ಮಳೆ...

2009-06-16T09:14:00.002+05:30

ಮಳೆ ಬಂತು ಮಳೆ

ಕೊಡೆ ಹಿಡಿದು ನಡೆ

ಮಣ್ಣಿನಲ್ಲಿ ಜಾರಿ ಬಿದ್ದು

ಬಟ್ಟೆಯಾಯ್ತು ಕೊಳೆ

ಬಿಸಿಲು ಬಂತು ಬಿಸಿಲು

ಕೋಟು ಟೋಪಿ ತೆಗೆ

ಬಾವಿಯಿಂದ ನೀರು ಸೇದಿ

ಸೋಪು ಹಾಕಿ ಒಗೆ

***

ಪುಟ್ಟ ಗುಬ್ಬಿ ..

2009-06-15T16:13:00.003+05:30

ಗುಬ್ಬಿ ಗುಬ್ಬಿ

ಚಿಂವ್ ಚಿಂವ್ ಎಂದು

ಹಾರುತ ಬಂದಿಹೆಯಾ

ಸುರಿಯುವ ಮಳೆಯ

ನೀರಲಿ ನೆನೆದು

ನಡುಗುತ ನಿಂತಿಹೆಯಾ ?

ಬಾಗಿಲ ತೆರೆದು

ಕಾಳನು ಹಿಡಿದು

ನಿಂದಿಹೆ ನಾನೀಗ

ಬೇಗನೆ ಹತ್ತಿರ

ಹಾರುತ ಬಂದು

ಕಾಳನು ತಿನ್ನುವೆಯಾ?

***

ಯಾರು ಏನು ಮಾಡಬೇಕು?

2009-06-12T15:34:00.009+05:30

ಕೊಕ್ಕೋ ಕೊಕ್ಕೋ ಕೋಳಿ

ಬೆಳಗಾಯ್ತು ಏಳಿ

ಚಿಂವ್ ಚಿಂವ್ ಇಲಿ

ಮಾಡಿನಿಂದ ಇಳಿ

ಅಂಬಾ ಅಂಬಾ ಕರುವೇ

ಹುಲ್ಲು ಹೊತ್ತು ತರುವೆ

ಮಿಯಾಂವ್ ಮಿಯಂವ್ ಬೆಕ್ಕೇ

ಕದ್ದು ಹಾಲು ನೆಕ್ಕೆ

ಬೌ ಬೌ ನಾಯಿ

ಸಾಕು ಮುಚ್ಚು ಬಾಯಿ

ಬುಸ್ ಬುಸ್ ಹಾವು

ಗೆಳೆಯರಲ್ಲ ನಾವು !

***

ನಮ್ಮ ಕರು ....

2009-06-11T08:58:00.003+05:30

ಅಮ್ಮನ ಕೆಚ್ಚಲ

ಹಾಲನು ಕುಡಿದು

ಬಾಲವ ಎತ್ತಿ

ಚಂಗನೆ ನೆಗೆದು

ಓಡುತ ಬರುವ

ನಮ್ಮ ಕರು

ಕೆಂಪನೆ ಬಣ್ಣದ

ನಮ್ಮ ಕರು

ಹಸಿರಿನ ಹುಲ್ಲನು

ಮೆಲ್ಲನೆ ಸವಿದು

ಕಿವಿಯನು ನಿಮಿರಿಸಿ

ಅಂಬಾ ಎಂದು

ಅಮ್ಮನ ಕರೆಯುವ

ನಮ್ಮ ಕರು

ಮುದ್ದಿನ ಪುಟಾಣಿ

ನಮ್ಮ ಕರು .

***

ಕಾಗೆ ...

2009-06-09T21:47:00.005+05:30

ಕಾ ಕಾ ಕಾ ಎಂದು

ಕೂಗಿ ಹೇಳುವೆ

ನಾನು ಏಳುವ ಮೊದಲೇ

ನೀನು ಏಳುವೆ !

ದಿನವು ಬೆಳಗು ಸಂಜೆಯಲ್ಲಿ

ನೀನು ಕೂಗುವೆ

ಮಲಿನವನ್ನು ತೆಗೆದು ಶುಚಿಯ

ನೀನು ಮಾಡುವೆ

ಹೊಳೆವ ಕಪ್ಪು ಬಣ್ಣ ನಿನಗೆ

ಚೂಪು ಕೊಕ್ಕು ಅಂದ

ದಿನವು ಬಾರೋ ನೀನು

ಎಂದು ಕರೆವನೀಗ ಕಂದ

***

ಮಂಗಣ್ಣ ...

2009-06-06T17:19:00.002+05:30

ಗೋಡೆಯಾಚೆಗೆ ಇಣುಕಿ

ನೋಡುವೆಯೇನು ಮಂಗಣ್ಣ ?

ಕಾಡನು ಬಿಟ್ಟು ಇಲ್ಲಿಗೆ

ನೀನು ಬಂದ ಕಾರಣವೇನಣ್ಣ ?

ಹಸಿವೆಯ ನೀಗಿಸೆ ಹಣ್ಣುಗಳು

ಬೇಕೆ ನಿನಗೆ ಮಂಗಣ್ಣ ?

ಮೆಲ್ಲನೆ ಇಳಿದು ಹತ್ತಿರ ಬಂದರೆ

ಎಲ್ಲವ ಕೊಡುವೆ ನಿನಗಣ್ಣ

***

ಪುಟ್ಟನ ಕನಸು ...

2009-06-03T09:27:00.001+05:30

ಪುಟಾಣಿ ಪುಟ್ಟ ನಿದ್ದೆಯಲೊಂದು
ಕಂಡ ಕನಸನ್ನು

ಅಣ್ಣನ ಕೂಡೆ ತಾರಾಲೋಕಕೆ
ಹೋದ ಕನಸನ್ನು

ಬೆಳ್ಳಿಯ ಚುಕ್ಕಿಯ ಮುಟ್ಟುತ
ಆಟವನಾಡಿದ ಕನಸನ್ನು

ಮೋಡದಿ ತೇಲುತ ಮೆಲ್ಲನೆ
ಮೇಲಕೆ ಜಿಗಿದ ಕನಸನ್ನು

ಓಡುತ ಆಡುತ ದಿನವಿಡೀ
ಕಳೆಯುತಲಿದ್ದ ಕನಸನ್ನು

ಪಕ್ಕನೆ ಅಮ್ಮನು ಕರೆದಂತಾಗೆ
ತೆಗೆದಾ ಮುಸುಕನ್ನು !
***

ಗುಡುಗು....

2009-06-02T09:04:00.003+05:30

ಗುಡು ಗುಡು ಭೀಕರ
ಸದ್ದನು ಮಾಡುತ
ಬರುವುದೇಕೆ ಗುಡುಗು ?

ಜಡಿಮಳೆಯೊಂದಿಗೆ
ಸೇರುತ ಭೂಮಿಗೆ
ಬರುವುದೇಕೆ ಗುಡುಗು ?

ಎದೆಯಲಿ ಢವ ಢವ
ಕಸಿವಿಸಿ ಹೆದರಿಕೆ
ಮಾಡುವುದೇಕೆ ಗುಡುಗು ?

ತೊಡಗಲು ರೈತರು
ಗದ್ದೆಯ ಕೆಲಸಕೆ
ಕಾಡುವುದೇಕೆ ಗುಡುಗು ?
***

ಮಿಂಚು ...

2009-06-01T08:45:00.002+05:30

ಬಾನಿನಿಂದ ತೆಗೆವ

ಛಾಯಚಿತ್ರವೇನು ಮಿಂಚು ?

ಹೊಳೆಯುತಿಹುದು ಗಗನವೊಮ್ಮೆ

ಯಾರದಮ್ಮ ಸಂಚು ?

ಕ್ಷಣಕ್ಕೊಮ್ಮೆ ಹೊಳೆದು

ಮಾಯವಾಗುವುದೀ ಮಿಂಚು

ನೋಡಿದರೆ ಕಾಣುವುದು

ಬಾನು ಭುವಿಯ ಅಂಚು

***

ಮಳೆ - ಬೆಳೆ ...

2009-05-26T20:57:00.003+05:30

ಬಾನಿನಿಂದ ಭುವಿಗೆ ಬಂತು

ತುಂತುರು ಮಳೆ

ರೈತರೆಲ್ಲ ಹರುಷಗೊಂಡು

ಬೆಳೆದರೆಲ್ಲ ಬೆಳೆ

ಬೆಳೆಯು ಬೆಳೆಯೆ ಗದ್ದೆಯಿಂದ

ಹಸಿರಾಯ್ತು ಇಳೆ

ಕಳೆಯು ತೆಗೆಯೆ ಗದ್ದೆಯಿಂದ

ಶುದ್ಧವಾಯ್ತು ಬೆಳೆ

***

ಮುಚ್ಚು ಮರೆಯಿಲ್ಲದೆಯೆ .....

2009-05-16T16:03:00.004+05:30

ಮುಚ್ಚು ಮರೆಯಿಲ್ಲದೆಯೆ ನಿನ್ನ ಮುಂದೆಲ್ಲವನು

ಬಿಚ್ಚಿಡುವೆ ಓ ಗುರುವೇ ಅಂತರಾತ್ಮ

ಪಾಪವಿದೆ ಪುಣ್ಯವಿದೆ ನರಕವಿದೆ ನಾಕವಿದೆ

ಸ್ವೀಕರಿಸು ಓ ಗುರುವೇ ಅಂತರಾತ್ಮ ..ಮುಚ್ಚು..

ರವಿಗೆ ಕಾಂತಿಯನೀವ ನಿನ್ನ ಕಣ್ಣೀಕ್ಷಿಸಲು

ಪಾಪ ತಾನುಳಿಯುವುದೆ ಪಾಪವಾಗಿ

ಗಂಗೆ ತಾನೋದ್ಭವಿಪ ನಿನ್ನಡಿಯ ಸೋಕಿಂಗೆ

ನರಕ ತಾನುಳಿಯುವುದೆ ನರಕವಾಗಿ ..ಮುಚ್ಚು ..

ಶಾಂತ ರೀತಿಯೊಳಿಮ್ಮಿ ಕದಡಿರುವುದೆನ್ನಾತ್ಮ

ನಾಂತ ರೀತಿಯು ಅದೆಂತೊ ಓ ಅನಂತ

ನನ್ನ ನೀತಿಯ ಪುರುಡಿನಿಂದೆನ್ನ ರಕ್ಷಿಸೆ

ನಿನ್ನ ನೀತಿಯ ಬೆಳಕಿನ ಆನಂದಕ್ಕೆ ...ಮುಚ್ಚು ...

-ಕುವೆಂಪು

***

ಮಂಗಳ ಪದ್ಯ ...

2009-05-13T09:13:00.003+05:30

ಜಲದಲಿ ಮತ್ಸ್ಯವತಾರನಿಗೆ

ಗಿರಿಯ ಬೆನ್ನಲಿ ಪೊತ್ತ ಕೂರ್ಮನಿಗೆ

ಧರೆಯನುದ್ಧರಿಸಿದ ವರಾಹವತಾರಗೆ

ತರಳನ ಕಾಯ್ದ ನರಸಿಂಹನಿಗೆ

ಭೂಮಿಯ ದಾನವ ಬೇಡಿದಗೆ

ಆ ಮಹಾ ಕ್ಷತ್ರಿಯರ ಗೆಲಿದವಗೆ

ರಾಮಚಂದಿರನೆಂಬ ದಶರಥ ಸುತನಿಗೆ

ಭಾಮೆಯರರಸ ಗೋಪಾಲನಿಗೆ

ಬತ್ತಲೆ ನಿಂತಿಹ ಬೌದ್ಧನಿಗೆ

ಅರ್ತಿಯಿ೦ದ ಹಯವೇರಿದ ಕಲ್ಕ್ಯನಿಗೆ

ಹತ್ತವತಾರದಿ ಭಕ್ತರ ಪೊರೆಯುವ

ಅಚ್ಚ್ಯುತ ಪುರಂದರ ವಿಠಲನಿಗೆ . ಮಂಗಳಂ

-ಪುರಂದರದಾಸರು

(ಶಾಲೆಯಲ್ಲಿ ಪ್ರತಿ ಶುಕ್ರವಾರ ನಡೆಯುತ್ತಿದ್ದ "ಭಜನೆ" ಯಲ್ಲಿ ಹಾಡುತ್ತಿದ್ದ ಮಂಗಳ ಪದ್ಯ )

***

ಎತ್ತಿನ ಗಾಡಿ ....

2009-05-06T12:11:00.003+05:30

ಗಡ ಗಡ ಗಡ ಗಡ ಸದ್ದನು ಮಾಡಿ

ಬರುತಿದೆ ನೋಡಿ ಎತ್ತಿನ ಗಾಡಿ

ಎತ್ತುಗಳೆರಡನು ಮುಂದಕೆ ಹೂಡಿ

ಕೈಯಲಿ ಕೋಲನು ಹಿಡಿದರೆ ನೋಡಿ

ಎಳೆಯುತ ಗಾಡಿಯ ಮುಂದಕೆ ಓಡಿ

ತಲುಪಿಪ ಗುರಿಯ ತಾ ಜತೆಗೂಡಿ

ಹಿಗ್ಗನು ಕುಗ್ಗನು ಭಾಗವ ಮಾಡಿ

ಹೊರುವವು ನಮಗೆ ಸುಖವನು ನೀಡಿ

ಈ ಪರಿ ಗಾಡಿಯ ನೀತಿಯ ನೋಡಿ

ಲೋಕಕೆ ಪಾಠವ ಕಲಿಸುವ ಮೋಡಿ

****

ಕಾಡಿಗೆ ಹೋಗೋಣ .....

2009-05-04T22:24:00.003+05:30

ತಂಪಿನ ಮರಗಳ

ಗುಂಪಿನ ಬಳಿಯ

ಕಾಡಿಗೆ ಹೋಗೋಣ .

ಬೆಳೆದ ಬಿದಿರ

ಮೆಳೆಗಳ ನೋಡುತ

ಆಟವನಾಡೋಣ

ಕಿಚ ಪಿಚ ಸದ್ದನು

ಮಾಡುವ ಹಕ್ಕಿಯ

ನೋಡೋಣ

ಕಾಡಲಿ ಸಿಗುವ

ಮಾವಿನ ಹಣ್ಣನು

ಹೆಕ್ಕುತ ಸವಿಯೋಣ

ಹಸಿರಿನ ಬನದ

ಅಂದವ ನೋಡಿ

ಪುಳಕಿತರಾಗೋಣ

***

ಪುಟ್ಟ ಇರುವೆ

2009-04-30T16:56:00.003+05:30

ಪುಟ್ಟದೊಂದು ಇರುವೆ

ಹೆಕ್ಕಿ ಚೂರು ಸಕ್ಕರೆ

ಹೋಗುತಿದೆ ತನ್ನ ಮನೆಗೆ

ಪುಳಕದಿಂದ ಆ ಕಡೆ

ಇರುವೇಗೆಕೆ ಸಕ್ಕರೆ

ಅಷ್ಟೊಂದು ಅಕ್ಕರೆ

ಪುಟ್ಟ ಚೂರು ಸಿಕ್ಕರೆ

ಬಿಡದೆ ಒಯ್ವುದಾಕಡೆ ?

ಒಮ್ಮೆ ಅಮ್ಮ ಸಿಕ್ಕರೆ

ನನ್ನ ನೋಡಿ ನಕ್ಕರೆ

ಪ್ರಶ್ನೆ ಕೇಳಿ ಬಿಟ್ಟರೆ

ಕೊಡುವಳೇನು ಉತ್ತರ ?

***

ಗೂಡಿನೆಡೆಗೆ ತೆರಳುವ .....

2009-04-20T21:44:00.002+05:30

ಹೊತ್ತು ಹೋಯಿತು ಕತ್ತಲಾಯಿತು

ದಿನಪನಸ್ತಕೆ ಪೋದನು

ದಿನದ ಕೆಲಸದ ದಣಿವ ನೀಗಲು

ಬಾರೆ ನಾವು ಹೋಗುವ

ಬೆಳಕು ಕಳೆದುದು ದಿನವು ಮುಗಿದುದು
ಮೆಲ್ಲ ಮನೆಯನು ಸೇರುವ

ಅಳುವ ಮಕ್ಕಳು ಕಾಯುತಿರುವರು

ಗೂಡಿನಲ್ಲಿ ಮೆಲ್ಲನೆ

ಗುಟಕ ನೀಡುತ ಹಸಿವ ನೀಗುತ

ಸುಖದ ನಿದ್ದೆಗೆ ಜಾರುವ

***

ಕೆರೆ ...

2009-04-19T10:55:00.003+05:30

ಕೆರೆ ಕೆರೆ ನಮ್ಮ ಕೆರೆ

ಕುಡಿವ ನೀರು ಕೊಡುವ ಕೆರೆ

ದೇವರು ಸ್ನಾನ ಮಾಡುವ ಕೆರೆ

ಪುಟ್ಟ ಮೀನು ಇರುವ ಕೆರೆ

ದೊಡ್ಡ ಆಮೆ ಇರುವ ಕೆರೆ

ಸುತ್ತ ಮೆಟ್ಟಿಲು ಇರುವ ಕೆರೆ

ಕೆರೆ ಕೆರೆ ನಮ್ಮ ಕೆರೆ

ಊರಿಗೊಂದು ದೊಡ್ಡ ಕೆರೆ

ತಂಪು ನೀರು ಕೊಡುವ ಕೆರೆ

ನಮ್ಮ ನೆಚ್ಚಿನ ದೊಡ್ಡ ಕೆರೆ ..

***

ಪುಣ್ಯ ಕ್ಷೇತ್ರ ನೋಡಿದೆನು ....

2009-04-01T21:37:00.003+05:30

ಪುಣ್ಯ ಕ್ಷೇತ್ರಕೆ ಹೋಗಿ

ನಾನು ಹರಕೆ ಮಂಡೆಯ

ನೀಡಿದೆನು

ಹರಿಯುವ ನದಿಯಲಿ ಸ್ನಾನವ

ಮಾಡಿ ದೇವರ ದರುಶನ
ಮಾಡಿದೆನು

ಸರತಿಯ ಸಾಲಲಿ ಮೊದಲಿಗನಾಗಿ

ಭೋಜನ ಶಾಲೆಯ

ಸೇರಿದೆನು

ಊಟವ ಮಾಡುತ ಕೈಗಳ

ತೊಳೆದು ಮೆಲ್ಲನೆ ಹೊರಗೆ

ಬಂದಿಹೆನು

ನಿಮ್ಮ ನಮ್ಮ ಎಲ್ಲರ

ದೇವನು ಪೊರೆಯಲಿ ಎಂದು

ಬೇಡಿದೆನು .

***

ಯಾಕೆ ಹೀಗೆ ....?

2009-03-20T21:54:00.003+05:30

ಏನೋ ವಾಸನೆ ಬರುತಿದೆಯಲ್ಲ

ಪರಿಸರ ಮಲಿನ ಮಾಡಿದಿರಲ್ಲ ?

ಬದುಕುವುದೆಂತು ನಾವು ಮುಂದೆ ?

ಕುಡಿಯುವ ನೀರು ಸೇವಿಪ ವಾಯು

ಎಲ್ಲವೂ ಕಲುಷಿತವಾಗಿದೆಯಲ್ಲ ?

ನಿಮ್ಮ ಆಸೆಗೆ ನಮಗೇತಕೆ ಶಿಕ್ಷೆ ?

ನಿಮ್ಮಂತೆಯೇ ನಾವೂ ಅಲ್ಲವೇ ?

ಕಾಡು ಕಡಿದು ನಾಡು ಮಾಡಿ

ಎಲ್ಲವ ಕಶ್ಮಲ ಮಾಡಿದಿರಲ್ಲ ?

ಏನನು ಸಾಧಿಸ ಹೊರಟಿರಿ ನೀವು ?

ನಾಳೆಗೆ ಬದುಕುವ ಚಿಂತೆಯಿಲ್ಲವೇನು ?

ಎಲ್ಲ ವಿಷಮಯ ಮಾಡುವಿರಲ್ಲ ?

ಏನೋ ವಾಸನೆ ಬರುತಿದೆಯಲ್ಲ
ಪರಿಸರ ಮಲಿನ ಮಾಡಿದಿರಲ್ಲ ?
ಬದುಕುವುದೆಂತು ನಾವು ಮುಂದೆ ?

***

ಗೆಳೆಯನಿಗೆ ವಿದಾಯ ....

2009-03-17T14:27:00.004+05:30

ನಡೆವೆ ನೀನು ಎನ್ನ ಬಿಟ್ಟು
ನಿನ್ನ ಬಾಳ ಗುರಿಯನು
ಸೇರಲೆಂದು ಜಗದ ಬಳಿಗೆ
ಎನ್ನ ಜೀವದ ಗೆಳೆಯನೆ

ಕಳೆದೆವೆ೦ತೊ ಹಲವು ದಿವಸ
ಕೂಡಿ ನಾವು ಹಿತದಲಿ
ಸರಸ ವಿರಸ ಕೊನೆಗೆ ಹರುಷ
ಕೂಡಿ ನಾವು ಹಂಚುತ

ಬಲಿತ ಹಕ್ಕಿ ಕಾಳು ಹೆಕ್ಕಿ
ತಿನ್ನಲೆಂದು ಹಾರುತ
ಮೇಲೆ ನೆಗೆವ ತೆರದಿ ನಾವು
ಜತೆಯ ಬಿಟ್ಟು ಅಗಲುತ

ಇರಲಿ ಪ್ರೀತಿ ಸ್ನೇಹವೆಂದು
ನಿರತ ನಮ್ಮಲೆನ್ನುತ
ಮರಳಿ ನಡೆವ ನಮ್ಮ ನೆಲೆಗೆ

ಸವಿಯ ನೆನಪ ಉಳಿಸುತ

***

ಲಾಟೀನು....

2009-03-16T13:55:00.003+05:30

ನೀರವ ಕತ್ತಲೆ ಸಮಯದಲಿ

ಮಂದ ಪ್ರಕಾಶವ ಬೀರುತಲಿ

ನೀಡುವೆ ಬೆಳಕನು ನಮಗಾಗಿ

ಕಪ್ಪನೆ ಬುರುಡೆಗೆ ಎಣ್ಣೆಯ

ತುಂಬಿಸಿ ಬತ್ತಿಯೇರಿಸಿ ಹೊತ್ತಿಸುವೆ

ಮೆತ್ತಗೆ ನೀನು ಪ್ರಕಾಶಿಸುವೆ

ಇರುಳಿನ ದಾರಿಗೆ ದೀಪವಾಗುತ

ಕಳೆಯುವೆ ಕತ್ತಲೆ ನಮಗಾಗಿ

ಮೆಲ್ಲನೆ ಹೊಗೆಯ ಹೊರಸೂಸಿ

ಕಿರುನಗೆ ಸೂಸುತ ಬೆಳಗುತಲಿರುವೆ

ನಮ್ಮಯ ಬಾಳಿನ ಬೆಳಕಾಗಿ

ನಿಶೆಗೆ ನೀನು ರಿಪುವಾಗಿ

****

ಕ್ಷೌರ

2009-03-11T09:08:00.011+05:30

ಭಾನುವಾರ ರಜೆಯು ಬರಲು

ಹೋಗುವೆ ಕ್ಷೌರಿಕನಂಗಡಿಗೆ

ಬೆಳೆದ ಕೂದಲ ತೆಗೆಸಲು

ನಾನು ಸಾಗುವೆ ಕ್ಷೌರಿಕನಂಗಡಿಗೆ

ತಿರುಗುವ ಕುರ್ಚಿಯ ಮೇಲೆ

ಕುಳಿತು ತಲೆಯನೊಪ್ಪಿಸುವೆ ಕ್ಷೌರಿಕಗೆ

ಸಾಣೆಗೆ ಹಿಡಿದ ಕತ್ತರಿ ತೆಗೆದು
ಕಿರ ಕಿರ ಕೂದಲ ಕತ್ತರಿಸೆ

ನೀರನು ಚಿಮುಕಿಸಿ ಬಾಚುತ ತಲೆಯ

ಕ್ಷೌರಿಕ ಕ್ಷೌರವ ಮುಗಿಸೆ

ಬೇಗನೆ ಮನೆಯನು ಸೇರುತ

ನಾನು ಸ್ನಾನವ ತೀರಿಸುವೆ .

***

ಸೂರ್ಯನಿಗೆ ನಮಸ್ಕಾರ ....

2009-03-09T09:18:00.004+05:30

ಸಹಸ್ರ ರಶ್ಮಿಯನು ಸೂಸುವ

ಜಗದ ಕರ್ಮಕೆ ಸಾಕ್ಷಿಯೇ

ಮೂಡು ದಿಕ್ಕಲಿ ಮೂಡುವಂಥ

ನಿನಗೆ ನಾನು ನಮಿಸುವೆ

ಜಗದ ಜೀವರ ಕಾಯಕದಲಿ

ಬೆಳಕ ನೀಡುತ ಹರಸುವೆ

ಕಮಲಿನೀ ನಾಯಕನೇ ನಿನಗೆ

ನಿತ್ಯ ನಾನು ನಮಿಸುವೆ

ಆತ್ಮ ಶಕ್ತಿ ಪ್ರಚೋದಿಸಿ

ಧೀ ಶಕ್ತಿಯ ವೃದ್ಧಿಸಿ

ನಿರತ ಹರಸುವ ಕಮಲಬಾಂಧವ

ನಿನಗೆ ನಾನು ನಮಿಸುವೆ

ಮೇಲಕೇರುತ ಪ್ರಖರನಾಗುತ

ಸಂಜೆ ಅಸ್ತಕೆ ಸೇರುವೆ

ಶಿರವ ಬಾಗಿಸಿ ಕರವ ಜೋಡಿಸಿ

ನಿನಗೆ ನಾನು ನಮಿಸುವೆ

***

ಬೇಡವೇ ಬೇಡ ....

2009-03-06T21:18:00.003+05:30

ಬೇಡವೇ ಬೇಡ

ಊಟವು ಬೇಡ

ಪಾಠವು ಬೇಡ

ನನಗೀಗ ಏನೂ ಬೇಡ

ಸುಮ್ಮನೆ ಆಟವ

ಆಡಲು ಬಿಡಿರಿ

ಹೋಗುವೆ ನಾ

ಗೆಳೆಯನ ಜೊತೆಗೆ ಆಟಕ್ಕೆ

ಟಿವಿ ಬೇಡ

ನೀವು ಕೊಡುವ

ಆಮಿಷ ಬೇಡ

ಹೋಗುವೆ ಈಗ ಆಟಕ್ಕೆ

ನಿಮ್ಮ ತಿಂಡಿ

ನಿಮಗೆ ಇರಲಿ

ನನಗೆ ಬೇಡ

ನಾ ಹೋಗುವುದು ಹೋಗುವುದೇ !

***

ನನ್ನ ಅಜ್ಜಿ

2009-03-05T09:43:00.007+05:30

ಅಜ್ಜಿ ಅಜ್ಜಿ ನನ್ನಜ್ಜಿ

ತಿಂಡಿಯ ಕೊಡುವ ನನ್ನಜ್ಜಿ

ಕಥೆಯನು ಹೇಳುವ ನನ್ನಜ್ಜಿ

ಪದ್ಯವ ಹೇಳುವ ನನ್ನಜ್ಜಿ

ಮದ್ದನು ಮಾಡುವ ನನ್ನಜ್ಜಿ

ಮುದ್ದನು ಮಾಡುವ ನನ್ನಜ್ಜಿ

ಮಲ್ಲಿಗೆ ಕೊಯ್ಯುವ ನನ್ನಜ್ಜಿ

ಮಾಲೆಯ ಮಾಡುವ ನನ್ನಜ್ಜಿ

ಮೆಲ್ಲನೆ ನಡೆಯುವ ನನ್ನಜ್ಜಿ

ಮೊಸರನು ಕಡೆಯುವ ನನ್ನಜ್ಜಿ

ಮಜ್ಜಿಗೆ ಮಾಡುವ ನನ್ನಜ್ಜಿ

ಬೆಣ್ಣೆಯ ಕೊಡುವ ನನ್ನಜ್ಜಿ

ಅಜ್ಜಿ ಅಜ್ಜಿ ನನ್ನಜ್ಜಿ

ಮುದ್ದು ಮುದ್ದು ನನ್ನಜ್ಜಿ

ಎಲ್ಲರ ಮುದ್ದಿನ ನನ್ನಜ್ಜಿ

***

(photo courtesy : SriVidya)

ನನ್ನ ಬಯಕೆ

2009-03-03T15:02:00.003+05:30

ಸದ್ದಿರದ ಪಸುರುಡೆಯ ಮಲೆನಾಡ ಬನಗಳಲಿ

ಮೊರೆವ ತೊರೆಯೆಡೆಯೊ೦ದರಲಿ ಗುಡಿಸಲೊಂದಿರಲಿ

ಅಲ್ಲಿ ಗಿಳಿ ಗೊರವಂಕ ಕೋಗಿಲೆಗಳ ಇಂಚರವು

ಕಲೆಯುತಲೆಯಲೆಯಾಗಿ ಕೇಳಿ ಬರುತಿರಲೆನಗೆ

ಅಲ್ಲಿ ಬಳಿ ಪಸಲೆಯಲಿ ದನಗಳಂಬಾ ಎಂಬ

ದನಿಯು ದನ ಕಾಯುವನ ಕೊಳಲೊಡನೆ ಬರಲಿ

ಅಲ್ಲಿ ಸಿರಿಗನ್ನಡದ ಕಬ್ಬಗಳ ಹಬ್ಬಗಳು

ದಿನ ದಿನವು ಸವಿಯೂಟವಿಕ್ಕುತಿರಲೆನಗೆ

ಬಾಂದಳದಿ ಹಾರಿದರು ಬುವಿಯಲ್ಲಿ ಜಾರುತಿಹ

ರಸಿಕನಾಗಿಹನೊಬ್ಬ ಗೆಳೆಯನಿರಲೆನಗೆ

ಬೈಗಾಗೆ ನಮ್ಮೊಡನೆ ಗಪಿಯಲೆದಡ್ಡಾಡೆ

ಗೋಪಾಲಕನಾಗಿರುವ ತಿಮ್ಮನೆನಗಿರಲಿ

ಮೇಲೆ ಬಾಳನು ಬಿಟ್ಟು ನಾನಳಿದು ಮರೆಯಾಗೆ

ನನ್ನಾಸೆಯೇನೆಂದು ಎಲ್ಲರರಿತಿರಲಿ

ಸಗ್ಗವಿವನೊಳಗೊ೦ಡಿರಲು ಸಗ್ಗವೆನಗಿರಲಿ

ನರಕವಿವನೊಳಗೊ೦ಡಿರಲು ನರಕವೆನಗಿರಲಿ

(ಕವಿ : ಕುವೆಂಪು )

***

ಎಲ್ಲಿ ಮನಕಳುಕಿರದೋ.....

2009-03-02T13:58:00.005+05:30

ಎಲ್ಲಿ ಮನಕಳುಕಿರದೋ ಎಲ್ಲಿ ತಲೆ ಬಾಗಿರದೋ

ಎಲ್ಲಿ ತಿಳಿವಿಗೆ ತೊಡಕು ತೋರದಿಹುದಲ್ಲಿ

ಎಲ್ಲಿ ಮನೆಯೊಕ್ಕಟ್ಟು ಸಂಸಾರ ನೆಲೆಗಟ್ಟು

ಧೂಳೊಡೆಯದಿಹುದೋ ತಾನಾನಾಡಿನಲ್ಲಿ

ಎಲ್ಲಿ ಸತ್ಯದಗಾಧ ನೆಲೆಯಿಂದ ಸವಿವಾತು

ಸಲ್ಲಲಿತ ನಡೆಯಿಂದ ಮುಂಬರಿವುದಲ್ಲಿ

ಎಲ್ಲಿ ದಣಿವಿರದೆ ಸಾಧನೆಯ ಸಫಲತೆ ಕಡೆಗೆ

ತೋಳ ನೀಡಿಹುದೋ ತಾನಾನಾಡಿನಲ್ಲಿ :ಎಲ್ಲಿ :

ಎಲ್ಲಿ ಸುವಿಚಾರ ನಿರ್ಮಲ ಜಲದೊಸರು ಹರಿದು

ಹಾಳು ರೂಢಿಯ ಮರಳೊಳಿಂಗಿ ಕೆಡದಲ್ಲಿ

ಎಲ್ಲಿ ನೀನೆಮ್ಮ ಚಿಂತನವನೂದ್ಯಮಿಸುವೆ

ವಿಶಾಲತೆಯ ಪೂರ್ಣತೆಗೆ ಮುಂಬರಿಸುವಲ್ಲಿ

ಅಲ್ಲಿಯಾ ಬಂಧನ ರಹಿತ ಸುಖದ ಸ್ವರ್ಗದಲಿ

ಪಾಲಿಸೈ ಪಿತ ನಮ್ಮ ನಾಡೆಚ್ಚರಿರಲಿ :ಎಲ್ಲಿ :

(ಕವಿ :ರವೀಂದ್ರ ನಾಥ ಠಾಗೋರ್ )

***

ಶ್ ! ಸದ್ದು ಮಾಡದಿರಿ

2009-02-26T09:33:00.004+05:30

ಶ್ ! ಸದ್ದು ಮಾಡದಿರಿ

ಏನೋ ಪರಿಮಳ ಬರುತಲಿದೆ

ತಿಂಡಿಯ ಪರಿಮಳ ಬರುತಲಿದೆ !

ಅಮ್ಮನು ಒಲೆಯಲಿ ಕರಿಯುತಲಿರಲು

ಬೇಗನೆ ತಿಂಡಿಯು ಸಿಗಲಿದೆ ನಮಗೆ !

ಅಪ್ಪನು ತಂದ ಬಾಳೇ ಕಾಯಿ

ಅಕ್ಕನು ತೆಳ್ಳಗೆ ತುಂಡರಿಸಿ

ಕುದಿಯುವ ಎಣ್ಣೆಗೆ ಬಿಡುವ ಪರಿಮಳ

ತೇಲಿ ಬರುತಿದೆ ಈ ಕಡೆಗೆ !

ಶ್ ! ಸದ್ದು ಮಾಡದಿರಿ
ತಿಂಡಿಯ ಪರಿಮಳ ಬರುತಲಿದೆ !

***

ಅಹಾ ! ಗೊಂಬೆ

2009-02-25T21:21:00.003+05:30

ಆಹಾ ! ಎಷ್ಟು ಮುದ್ದಿನ ಗೊಂಬೆ

ನೋಡಲು ಬಲು ಅಂದ

ನಿನ್ನ ಕೈಯ್ಯಲಿ ತಿರುಗುವ ಗೊಂಬೆ

ಆಡಲು ಬಲು ಚೆಂದ

ಮಿರಮಿರ ಮಿಂಚುವ ಮುದ್ದಿನ ಗೊಂಬೆ

ಕಾಣಲು ಬಲು ಅಂದ

ನನಗೆ ಕೊಡುವೆಯಾ ಆಡಲು ಅದನು

ಪಡೆಯುವೆ ಆನಂದ

ನಾನೂ ತಮ್ಮನು ಸೇರುತ ಆಡಲು

ಕೊಡುವೆಯ ನಮಗೀಗ ?

ಆಹಾ ! ಎಷ್ಟು ಮುದ್ದಿನ ಗೊಂಬೆ
ನೋಡಲು ಬಲು ಅಂದ

***

ಬಾಲ ಮುದ್ದು ಕೃಷ್ಣ

2009-02-12T11:58:00.004+05:30

ಪುಟ್ಟ ಪುಟ್ಟ ಹೆಜ್ಜೆ ಇಟ್ಟು

ಬಂದನು ಮುದ್ದು ಕೃಷ್ಣ

ಬೆಣ್ಣೆ ಮುದ್ದೆ ಕದ್ದು

ತಿನ್ನೋ ಕಳ್ಳ ಕೃಷ್ಣ !

ನವಿಲ ಗರಿಯ ಸೊಗಸಿಗೆ

ಮನಸೋತ ಕೃಷ್ಣ

ತೆಗೆದು ತಲೆಯೊಳಿರಿಸಿ

ಮೆರೆವ ಪುಟಾಣಿ ಕೃಷ್ಣ

ಬಾರೋ ಬಾರೋ ನನ್ನ ಬಳಿ

ಬೇಗನೆ ಕೃಷ್ಣ

ಹಾಲು ಮೊಸರು ಬೆಣ್ಣೆ ಕೊಡುವೆ

ತಿನ್ನೋ ಕೃಷ್ಣ

(ಕವಿ :ಸುಬ್ರಹ್ಮಣ್ಯ ಭಟ್)

***

(photo courtesy : www.nanndagokula.blogspot.com)

ಎಣ್ಣೆ ಹೊಯ್ಯಮ್ಮ ದೀಪಕ್ಕೆ.....

2009-02-11T20:48:00.004+05:30

ಎಣ್ಣೆ ಹೊಯ್ಯಮ್ಮ ದೀಪಕ್ಕೆ

ಬತ್ತಿ ಒಣಗುತ್ತಿದೆ ಬೆಳಕು ಬಾಡುತ್ತಿದೆ

ಕತ್ತಲೆ ಮುಂದೆ ಮುಂದೊತ್ತಿದೆ

ಅತ್ತಲಿ೦ದಿತ್ತಲು ಕಂಡಿಯೊಳಗೆ ನುಗ್ಗಿ

ಒತ್ತರದಲಿ ಗಾಳಿ ಬೀಸುತ್ತಿದೆ :ಎಣ್ಣೆ :

ಹೊರಗಲ್ಲಿ ಗಿಡ ಮರ ಕೊಂಬೆ ರೆ೦ಬೆಗಳು

ಬಡಿದಾಡಿಕೊಂಡು ಭೋರಿಡುತ್ತಿವೆ

ಪಡು ಬಾನ ಕಾರ್ಮುಗಿಲರಿಯೊ೦ದದ೦ನೆ

ಕುಡು ಮಿಂಚಿನಲಿ ಗಹಗಹಿಸುತ್ತಿದೆ :ಎಣ್ಣೆ :

ಹಸಿದ ಮಕ್ಕಳು ಬಟ್ಟಲೆನ್ನದು ತನ್ನದೆಂ

ದೆಳೆದಾಡಿಕೊಂಡು ಗುದ್ದಾಡುತ್ತಿವೆ

ಹಿರಿಯರ ಸಂಧ್ಯಾವಂದನೆ ಸಾಹಿತ್ಯ

ಕಡೆಗಾಲೊಳೆಡವಿ ಚೆಲ್ಲಾಡುತ್ತಿವೆ :ಎಣ್ಣೆ :

ಗೋಡೆಯ ಬಳಿಯಿಂದ ಹಸಿರು ಕಣ್ಣಿನ ಭೂತ

ಹಾಲಾಳಗೆಯ ಬಳಿ ಸಾರುತ್ತಿದೆ

ಗೂಡಿನ ಗಿಳಿ ಹೆಸರೆತ್ತಿ ಕರೆದು ಕೀರಿ

ಕಾಣಾದೆ ನಿನ್ನ ಕಂಗೆಡುತ್ತಲಿದೆ

ಎಣ್ಣೆ ಹೊಯ್ಯಮ್ಮ ದೀಪಕ್ಕೆ...

(ಕವಿ :ಸೇಡಿಯಾಪು ಕೃಷ್ಣ ಭಟ್ )

***

ನಾಯಿ ಮರಿ

2009-01-16T15:49:00.002+05:30

ತೋಟದ ಮನೆಯ

ಪಕ್ಕದ ಗೂಡಲಿ

ನಾಯಿ ಮರಿ ಕುಳಿತಿತ್ತು

ಹಾರುತ ಬಂದ

ಮಂಗನ ನೋಡಿ

ಕುಂಯ್ ಕುಂಯ್ ಅಂದಿತ್ತು

ಅಮ್ಮ ನಾಯಿಯು

ಇದನು ಕಂಡು

ಓಡುತ ಬಂದಿತ್ತು

ಮರದ ಮೇಲಿನ

ಮಂಗನ ಕಂಡು

ಬೌ ಬೌ ಬೊಗಳಿತ್ತು

ನಾಯಿಯ ಕಂಡು

ಮಂಗನು ಬೇಗನೆ

ಓಡಲು ತೊಡಗಿತ್ತು

ಅಮ್ಮ ನಾಯಿಯು

ಮರಿಯನು ನೆಕ್ಕುತ

ಮುದ್ದು ಮಾಡಿತ್ತು .

***

ಮಾವಿನ ಮರ

2009-01-14T12:08:00.003+05:30

ರುಚಿ ರುಚಿ ಮಾವಿನ

ಹಣ್ಣನು ಕೊಡುವ

ಮಾವಿನ ಮರವೇ ಅಂದ

ತಣ್ಣನೆ ನೆರಳನು

ನೀಡುವ ಮರದ

ಚಿಗುರೆಲೆ ನೋಡಲು ಚ೦ದ

ತಳಿರಿನ ನಡುವೆ

ಮರಿ ಕೋಗಿಲೆಯು

ಹಾಡನು ಹಾಡಲು ಅಂದ

ಬೀಸುವ ಗಾಳಿಗೆ

ಬೀಳುವ ಹಣ್ಣನು

ಹೆಕ್ಕುತ ಸವಿಯಲು ಆನಂದ !

***

ಸಂಕ್ರಾಂತಿ ಹಬ್ಬ

2009-01-08T10:09:00.003+05:30

ಹಬ್ಬವೇ ಹಬ್ಬವು

ಸಂಕ್ರಾಂತಿ ಹಬ್ಬವು

ಬರುತಿದೆ ನೋಡಣ್ಣ

ಎಳ್ಳು ಬೆಲ್ಲ ಸೇವಿಸಿ

ನಾವು ಹಾಡುತ

ನಲಿಯುವ ಬಾರಣ್ಣ

ಸಂಕ್ರಾಂತಿ ಹೂವಿನ

ದಂಡೆಯ ಹಿಡಿದು

ಆಟವನಾಡೋಣ

ಬೆಟ್ಟದ ಮೇಲಿನ

ಗಣಪನ ಗುಡಿಗೆ

ಓಡುತ ಹೋಗೋಣ

ಭಟ್ಟರು ಕೊಡುವ

ಅಪ್ಪ ಮೋದಕವ

ಸವಿಯನು ಸವಿಯೋಣ

ಹಬ್ಬವೇ ಹಬ್ಬವು
ಸಂಕ್ರಾಂತಿ ಹಬ್ಬವು
ಬರುತಿದೆ ನೋಡಣ್ಣ

***

ನದಿ ಸ್ನಾನ

2009-01-07T14:07:00.002+05:30

ಪಲ್ಗುಣಿ ನದಿಯ

ತೀರಕೆ ಹೋಗಿ

ಆಟವನಾಡೋಣ

ಮರಳಿನ ದಿಣ್ಣೆಯ

ಮನೆಯನು ಕಟ್ಟಲು

ಎಲ್ಲರು ಸೇರೋಣ

ದುಂಡಗಿನ ಕಲ್ಲನು

ಆರಿಸಿ ರಾಶಿಯ

ಮಾಡೋಣ

ಸುಣ್ಣದ ಕಲ್ಲಿನ

ಚಿಪ್ಪನು ಹೆಕ್ಕುತ

ಲೆಕ್ಕವ ಹಾಕೋಣ

ನೀರಲಿ ಇಳಿದು

ಎಲ್ಲರು ನಾವು

ಬೇಗನೆ ಈಜೋಣ

ಸ್ನಾನವ ಮಾಡಿ

ಆಟವನಾಡಿ

ಮನೆಯನು ಸೇರೋಣ

***

ಏಳುವ ಸಮಯ

2009-01-06T09:30:00.000+05:30

ಬಾನಲಿ ರವಿಯು

ಮೂಡುವ ಸಮಯ

ಭಟ್ಟರು ಪೂಜೆಯ
ಮಾಡುವ ಸಮಯ

ಶೆಟ್ಟರು ಅಂಗಡಿ
ತೆರೆಯುವ ಸಮಯ

ಅಮ್ಮನು ರಂಗೋಲಿ
ಹಾಕುವ ಸಮಯ

ಅಕ್ಕನು ನೀರನು
ತರುವ ಸಮಯ

ಹೂವಿನ ಪರಿಮಳ
ಬೀರುವ ಸಮಯ

ಹಾರುವ ಹಕ್ಕಿಯು
ಉಲಿಯುವ ಸಮಯ

ನಾನು ನಿತ್ಯವೂ
ಏಳುವ ಸಮಯ !
***

ಮೊಲದ ಮರಿ

2009-01-05T10:05:00.001+05:30

ಹಾರುತ ಜಿಗಿಯುತ
ಹತ್ತಿರ ಬಂದಿತು
ಮೊಲದ ಮರಿಯೊಂದು

ಚಿಗುರೆಲೆ ಹುಲ್ಲನು
ಸವಿಯುತ ನಿಂತಿತು
ಮುದ್ದಿನ ಮರಿಯಂದು

ಇದನು ಕಂಡ
ನಾಯಿಯ ಮರಿಯು
ಬೊಗಳಿತು ಬೌ ಎಂದು

ಕಿವಿಯನು ನಿಮಿರಿಸಿ
ಪೊದರಿನೊಳಡಗಿತು
ಮೊಲದ ಮರಿಯಂದು !
***

ಗಿಳಿ ..

2009-01-04T13:49:00.001+05:30

ಮಾವಿನ ಮರದ
ಚಿಗುರೆಲೆ ನಡುವೆ
ಕುಳಿತಿಹ ಗಿಳಿಯೇ
ಬಾ ಬಾ ಬಾ

ಕೆಂಪು ಮೂಗಿನ
ಮುದ್ದಿನ ಗಿಳಿಯೇ
ಹಾರುತ ಹತ್ತಿರ
ಬಾ ಬಾ ಬಾ

ಸೀಬೆಯ ಮರದ
ಹಣ್ಣನು ಕುಕ್ಕಿ
ತಿನ್ನುವ ಗಿಳಿಯೇ
ಬಾ ಬಾ ಬಾ

ಹಣ್ಣನು ಕೊಡುವೆ
ಹಾಲನು ನೀಡುವೆ
ಬೇಗನೆ ನೀನು
ಬಾ ಬಾ ಬಾ

ನಾನು ನೀನು
ಆಟವನಾಡುತ
ಸಮಯವ ಕಳೆಯೆ
ಬಾ ಬಾ ಬಾ
***

ಗೋಮ್ಮಟೇಶ

2008-12-26T17:25:00.004+05:30

ಬೆಟ್ಟದ ಮೇಲೆ
ನೆಟ್ಟನೆ ನಿಂತಿಹ
ಗೊಮ್ಮಟೇಶನ ನೋಡಣ್ಣ

ಮಂದಹಾಸವ ಬೀರುತ
ನಿಂದಿಹ ಶಾಂತಿಯ
ಮೂರುತಿ ನೋಡಣ್ಣ

ದಿನ ದಿನ ಜನರು
ದರುಶನ ಮಾಡಲು
ಬರುವರಿಲ್ಲಿಗೆ ನೋಡಣ್ಣ

ಮಜ್ಜನ ಮಾಡುವ
ಸಮಯಕೆ ಎಲ್ಲರು
ಹಾಡುತ ನಲಿವರು ನೋಡಣ್ಣ .

(ಕವಿ : ಸುಬ್ರಹ್ಮಣ್ಯ ಭಟ್)

***

ಮಂಗಣ್ಣ

2008-12-26T09:29:00.002+05:30

ಮರದಿಂದ ಮರಕೆ
ಹಾರುತ ಬರುವ
ಕೆಂಪನೆ ಮುಖದ ಮಂಗಣ್ಣ

ಸುಲಿದ ಬಾಳೆಯ
ಹಣ್ಣನು ಕೊಡುವೆ
ಬೇಗನೆ ನೀನು ನುಂಗಣ್ಣ

ಹಲ್ಲನು ಕಿರಿಯುತ
ಕಣ್ಣನು ಮಿಟುಕಿಸಿ
ಟಿರಿ ಟಿರಿಗುಟ್ಟುವುದೇಕಣ್ಣ

ಕಾಡಿನ ಮರದಲಿ
ಸಿಗುವ ಹಣ್ಣನು
ತಿನ್ನುತ ನೀನು ಬಾಳಣ್ಣ

***

ಸುಗ್ಗಿ ಸಂಭ್ರಮ

2008-12-24T17:49:00.007+05:30

ಗದ್ದೆಯ ಬದಿಯ

ತೆಂಗಿನ ಮರದಲಿ

ಗೀಜಗನ ಗೂಡು

ಸೋರೆಯ ಬುರುಡೆ

ಕಟ್ಟಿದ ಹಾಗೆ

ಕಾಣುತಿದೆ ನೋಡು

ಗದ್ದೆಯ ನಡುವೆ

ಕೇಳಿ ಬರುತಿದೆ

ಸುಗ್ಗಿಯಾ ಹಾಡು

ಕೊಯ್ಲನು ಕೊಯ್ದು

ರೈತನ ಮನೆಯ

ಕಣಜವ ನೀ ನೋಡು

ಸುಗ್ಗಿಯು ಬರುತಿರೆ

ಹಿಗ್ಗುತ ಬೇಗನೆ

ಸಿಹಿಯೂಟವ ಮಾಡು

(ಕವಿ : ಸುಬ್ರಹ್ಮಣ್ಯ ಭಟ್ )

***

ದುಂಬಿ

2008-12-23T12:57:00.002+05:30

ಹಾರುತ ಹಾರುತ

ಹತ್ತಿರ ಬಂದಿತು

ದುಂಬಿಯು ತಾನೊಂದು

ಹೂವಿನ ಮಧುವನು

ಹೀರಲಿಕೆಂದು ತವಕದಿ

ಬಳಿ ಬಂದು

ಅರಳಿದ ಹೂವಿನ

ರಸವನು ಹೀರುತ

ಮೆಲ್ಲನೆ ತಾ ಸವಿದು

ರೆಕ್ಕೆಯ ಬಡಿಯುತ

ಹಾರುತ ಹೋಯಿತು

ಗಗನದ ಕಡೆಗಂದು.

***

ಗೊಂಬೆ

2008-12-18T11:44:00.002+05:30

ಮರದಲಿ ಮಾಡಿದ ಚೆಲುವಿನ ಗೊಂಬೆ

ಕರಚಳಕದಿ ಕೊರೆ ಕೊರೆದಿಹ ಗೊಂಬೆ

ಗರ ಗರ ತಿರುಗುವ ಮಾಟದ ಗೊಂಬೆ

ಕಿರಿಯರು ಹಿರಿಯರು ಮೆಚ್ಚುವ ಗೊಂಬೆ

ಚಿನ್ನದ ಹಾಗೆ ಹೊಳೆಯುವ ಗೊಂಬೆ

ರನ್ನದ ಹಾಗೆ ಮಿನುಗುವ ಗೊಂಬೆ

ಕಣ್ಣನು ಮಿಟುಕಿಸಿ ಆಡುವ ಗೊಂಬೆ

ಪಿಂ ಪಿಂ ಪಿಂ ಪಿಂ ಎನ್ನುವ ಗೊಂಬೆ

ಕು೦ಯ ಕು೦ಯ ಕು೦ಯ ಕು೦ಯ ಎನ್ನುವ ಗೊಂಬೆ

ಕೊಳ್ಳಿರಿ ಮಕ್ಕಳು ಪೀಂ ಪೀಂ ಗೊಂಬೆ

ಕೊಳ್ಳಿರಿ ಕ್ಯುಮ್ ಕ್ಯುಮ್ ಎನ್ನುವ ಗೊಂಬೆ

ಬನ್ನಿರಿ ಬನ್ನಿರಿ ಮುಂದಕೆ ನುಗ್ಗಿ

ಚನ್ನಿಗ ಬಂದನು ಭರದಿಂ ನುಗ್ಗಿ

ಕಂದನಿಗೆನ್ನುತ ನೋಡಿದ ಬಾಗಿ

ಗೊಂಬೆಯ ಕೊಂಡನು ಹರ್ಷಿತನಾಗಿ

(ಕವಿ: ಶಾ೦ತಿರಾಂ )

***

ಪದ್ದು

2008-12-12T21:49:00.002+05:30

ಅವಳ ಹೆಸರು ಪದ್ದು
ಬುದ್ಧಿಯಿಲ್ಲ ಪೆದ್ದು
ಮನೆಯಲೆಲ್ಲ ಮುದ್ದು
ತಿನ್ನೋದೆಲ್ಲ ಕದ್ದು
ಒಮ್ಮೆ ಸಿಕ್ಕಿ ಬಿದ್ದು
ಬಿತ್ತು ನಾಲ್ಕು ಗುದ್ದು !

***

ಗುಂಡ

2008-12-11T21:31:00.002+05:30

ಉಂಡಾಡಿ ಗುಂಡ
ಮದುವೆ ಮನೆಗೆ ಹೋದ
ಹತ್ತು ಲಾಡು ತಿಂದ
ಹೊಟ್ಟೆ ನೋವು ಅಂದ
ಅಮ್ಮ ಬೆಣ್ಣೆ ಕೊಟ್ಟಳು
ಇನ್ನು ಬೇಕು ಅಂದ
ಅಪ್ಪ ದೊಣ್ಣೆ ತಂದನು
ಕೈ ಕಟ್ ಬಾಯಿ ಮುಚ್ !
***

ಊರ ಜಾತ್ರೆ

2008-12-11T13:01:00.003+05:30

ಊರಿನ ತೇರನು
ನೋಡಲಿಕೆ೦ದು
ಜನರೆಲ್ಲರು ಬಂದು

ದೇವರ ಉತ್ಸವ
ಬಲಿಯನು ನೋಡಲು
ಮೌನದಿ ತಾ ನಿಂದು

ಡೋಲು ಗಂಟೆಯು
ವಾದ್ಯವು ಕಹಳೆಯು
ಸದ್ದನು ಮಾಡಿರಲು

ಮಲ್ಲಿಗೆ ಸಂಪಿಗೆ
ಬಗೆ ಬಗೆ ಹೂಗಳ
ಪರಿಮಳ ತುಂಬಿರಲು

ಚೆಂಡೆಯ ಬಡಿದು
ಪಟಾಕಿ ಸಿಡಿದು
ಸಡಗರದಿಂದಿರಲು

ದೇವರ ಹೊತ್ತು
ಬಲಿಯನು ಬರುತಿರೆ
ಭಕ್ತರು ಜಯವೆಂದು

ದೇವರ ರಥದಲಿ
ಕೂರಿಸಿ ತೇರನು
ಎಳೆಯುತ ನಡೆತಂದು

ಹರಿಯುವ ನದಿಯ
ಬದಿಯಲಿ ನಿಲ್ಲಿಸಿ
ಪೂಜೆಯ ಕೈಗೊಂಡು

ದೇವರು ಸ್ನಾನವ
ವಿರಚಿಸೆ ಜಾತ್ರೆಯು
ಕೊನೆಯಾಯಿತು ಅಂದು .

(ಕವಿ :ಸುಬ್ರಹ್ಮಣ್ಯ ಭಟ್ )

***

ಪುಟಾಣಿ ಅಳಿಲು

2008-12-10T09:22:00.003+05:30

ಅಳಿಲೆ ಅಳಿಲೆ

ಪುಟಾಣಿ ಅಳಿಲೆ

ಹತ್ತಿರ ಬಾರಿಲ್ಲಿ

ಚಿಂವ್ ಚಿಂವ್ ಎನ್ನುತ

ಬಾಲವ ಕುಣಿಸಿ

ಹೊರಟಿಹೆ ನೀನೆಲ್ಲಿ ?

ಹಣ್ಣನು ಕೊಡುವೆ

ಹಾಲನು ನೀಡುವೆ

ಬೇಗನೆ ಬಾರಿಲ್ಲಿ

ಬಾನಲಿ ಕಟ್ಟಿದ

ಕಾಮನ ಬಿಲ್ಲನು

ತೋರುವೆ ನೋಡಲ್ಲಿ

ಪುಟಾಣಿ ಅಳಿಲೆ

ನೀನು ಬಂದರೆ

ಆಡುವ ನಾವಿಲ್ಲಿ

ಅಮ್ಮನು ಕೊಟ್ಟಿಹ

ತಿಂಡಿಯನೆಲ್ಲವ

ಕೊಡುವೆನು ನಿನಗಿಲ್ಲಿ

ನಾನೂ ನೀನೂ

ಕೂಡುತಲೀಗ

ಆಟವನಾಡೋಣ

ಅಮ್ಮನು ಕರೆಯೆ

ನಮ್ಮ ಮನೆಯನು

ಬೇಗನೆ ಸೇರೋಣ

(ಕವಿ : ಸುಬ್ರಹ್ಮಣ್ಯ ಭಟ್ )

***

ಮುದ್ದು ಕಂದ...

2008-12-09T10:14:00.004+05:30

ಬಾನಿನಲ್ಲಿ ಸೂರ್ಯ ದೇವ

ಮೇಲಕೇರಿ ಬಂದ

ನಿದ್ದೆ ಕಳೆದು ಮೇಲಕೇಳು

ಬಾಲ ಮುದ್ದು ಕಂದ

ಹಕ್ಕಿಗಳ ಇಂಚರವು ಸವಿಯೆ

ಕಿವಿಗೆ ಅಂದ

ಮಂಜಿನ ಹನಿಗಳೆಲ್ಲ

ಹುಲ್ಲ ಮೇಲೆ ಚೆಂದ

ಬೇಗನೆದ್ದು ಮುಖವ ತೊಳೆಯೋ

ಬಾಲ ಮುದ್ದು ಕಂದ

ನಿನ್ನ ಆಟ ಪಾಠವೀಗ

ಮಾಡಬೇಕು ಬೇಗ

ನಿದ್ದೆ ಕಳೆದು ಮೇಲಕೇಳು
ಬಾಲ ಮುದ್ದು ಕಂದ

(ಕವಿ : ಸುಬ್ರಹ್ಮಣ್ಯ ಭಟ್ )

***

ಗಿರಿಗಿಟ್ಟಿ

2008-12-05T21:05:00.002+05:30

ಗಿರ ಗಿರ ತಿರುಗುವ ಗಿರಿಗಿಟ್ಟಿ
ಸುರಗಿ ಎಲೆಯ ಗಿರಿಗಿಟ್ಟಿ

ಕಡ್ಡಿಗೆ ಪೋಣಿಸಿ
ಕೈಯಲಿ ಹಿಡಿದು

ಗಾಳಿಗೆ ತಿರುಗುವ ಗಿರಿಗಿಟ್ಟಿ
ಗಿರ ಗಿರ ತಿರುಗುವ ಗಿರಿಗಿಟ್ಟಿ

***

ಲಗೋರಿ

2008-12-04T12:30:00.005+05:30

ಲಗೋರಿ ಆಟವ ಆಡಲು ಬನ್ನಿರಿ
ಗೆಳೆಯರೆ ನೀವೆಲ್ಲ
ಗುಂಪುಗಳೆರಡನು ಮಾಡುತ
ನಾವು ಆಡುವ ಈಗೆಲ್ಲ

ಕಲ್ಲುಗಳೇಳನು ಬೇಗನೆ
ಇರಿಸುತ ಒಂದರಮೇಲೊಂದು
ಗೋರಿಯ ಕಟ್ಟಲು ಚೌಕದೊಳಗೆ
ಆಟವು ಸುರುವಂದು

ಚೆಂಡನು ಹಿಡಿದು ಗುರಿಯನು ಕೆಡೆದು
ಓಡುತ ನಾವಿಂದು
ಜಾಣರಂತೆ ಗೋರಿಯ ಕಟ್ಟಲು
ತಪ್ಪಿಸಿಯಾ ಚೆಂಡು

ಆಟವು ಮುಗಿದುದು ಗೋರಿಯ ಕಟ್ಟಲು
ಲಗೋರಿ ಎಂದೆನುತ
ಹಾರುತ ಆಡುವ ಬನ್ನಿರಿ
ಗೆಳೆಯರೆ ನಾವೀಗಲೆ ಕಲೆತು

(ಕವಿ : ಸುಬ್ರಹ್ಮಣ್ಯ ಭಟ್ )

***

ಕಳ್ಳ ಬೆಕ್ಕು

2008-12-03T17:34:00.004+05:30

ಮಿಯಾಂವ್ ಮಿಯಾಂವ್ ಮಿಯಾಂವ್

ಎಂದು ಬೆಕ್ಕು ಬಂದಿತು

ಕಳ್ಳ ಹೆಜ್ಜೆ ಇಟ್ಟು

ಅಡುಗೆ ಮನೆಯ ಹೊಕ್ಕಿತು

ಹಾಲ ಪಾತ್ರೆ ಮುಚ್ಚಳನ್ನು

ಕೊಡವಿ ಹಾಕಿತು

ಪಾತ್ರೆಯೊಳಗೆ ತಲೆಯ ಹಾಕಿ

ನೆಕ್ಕ ತೊಡಗಿತು

ಇದನು ತಿಳಿದ ಅಮ್ಮ

ಮೆಲ್ಲ ಕೋಲು ತಂದಳು

ದೂರದಿಂದ ತಿರುಗಿ ನೋಡಿ

ಬೆಕ್ಕು ಓಡಿತು !

(ಕವಿ : ಸುಬ್ರಹ್ಮಣ್ಯ ಭಟ್ )

***

ಮಿಂಚುಳ್ಳಿ

2008-12-02T21:10:00.004+05:30

ಮಾವಿನ ಮರದ ಟೊ೦ಗೆಯಲಿ

ಮಿಂಚುಳ್ಳಿ ಕುಳಿತಿತ್ತು

ಅತ್ತ ಇತ್ತ ಕೊಂಕಿಸಿ ಕೊರಳ

ಕೆರೆಯನು ನೋಡಿತ್ತು

ಮೇಲಿಂದ ನೀರಿನೊಳಗೆ

ಒಮ್ಮೆಲೇ ಹಾರಿತ್ತು

ಮೇಲಕೆ ಬರುತ ಬಾಯೊಳು

ಒಂದು ಮೀನನು ಕಚ್ಚಿತ್ತು

ಹಾರುತ ಹೋಗಿ ತನ್ನಯ

ಮರಿಗೆ ಗುಟುಕನು ಕೊಟ್ಟಿತ್ತು

ಮೀನನು ತಿಂದು ಮರಿ ಮಿಂಚುಳ್ಳಿ

ಚೀಂವ್ ಚೀಂವ್ ಎಂದಿತ್ತು

(ಕವಿ : ಸುಬ್ರಹ್ಮಣ್ಯ ಭಟ್ )

***

ಚಿಟ್ಟೆ

2008-12-01T21:16:00.003+05:30

ಬಣ್ಣದ ಚಿಟ್ಟೆ

ಬೇಗನೆ ಬಾರಿಲ್ಲಿ

ತರತರ ಬಣ್ಣದ

ಚಿತ್ರವ ನಿನ್ನಲಿ

ಬರೆದವರೀಗೆಲ್ಲಿ ?

ಹೂವಿನ ಎಸಳಲಿ

ಮೊಗ್ಗಿನ ಬದಿಯಲಿ

ಮೆಲ್ಲನೆ ನೀ ಕುಳಿತು

ಹಾರುತ ಹಾರುತ

ಮೇಲಕೆ ಹೋಗುವೆ

ರೆಕ್ಕೆಯ ನೀ ಬಡಿದು

ಬಾ ಬಾ ಚಿಟ್ಟೆ

ನಿನ್ನನು ಮುಟ್ಟಿ

ಅಮ್ಮಗೆ ತೋರುವೆನು

ಕೈಯಲಿ ಮೆತ್ತಿದ

ಬಣ್ಣವ ಕಂಡು

ಪುಳಕವಗೊಳ್ಳುವೆನು !

(ಕವಿ : ಸುಬ್ರಹ್ಮಣ್ಯ ಭಟ್ )

***

ಟೊಪ್ಪಿ ದಾಸಪ್ಪ

2008-11-29T17:10:00.003+05:30

ಟೊಪ್ಪಿಯ ಮಾರುವ ಕೆಲಸವ ಮಾಡಿ

ಹೊಟ್ಟೆಯ ಹೊರೆವನು ದಾಸಪ್ಪ

ಟೊಪ್ಪಿಯ ಮಾರಲು ಪಕ್ಕದ

ಊರಿಗೆ ಸಾಗುತಲಿರಲು ದಾಸಪ್ಪ

ಬಿಸಿಲಿನ ಬೇಗೆಗೆ ಹಸಿವಿನ ತಾಪಕೆ

ಮಾಮರದಡಿಯಲಿ ಕುಳಿತಿರಲು

ಬುತ್ತಿಯ ಬಿಚ್ಚಿ ರೊಟ್ಟಿಯ ತೆಗೆದು

ಹಸಿವನು ನೀಗಿದ ದಾಸಪ್ಪ

ಮಾಮರದಲ್ಲಿ ಮಂಗಗಳೆಲ್ಲ

ಟಿರಿ ಟಿರಿಗುಟ್ಟುತ ಕುಳಿತಿರಲು

ಟೊಪ್ಪಿಯ ದಾಸಪ್ಪನ ಕಂಡು

ಹಲ್ಲನು ಗಿಂಜಿ ಕಿರಿಗುಡಲು

ಊಟದ ಬಳಿಕ ನಿದ್ದೆಯ ಮಾಡಿದ

ಮರದ ಬುಡದಲಿ ದಾಸಪ್ಪ

ಮರವನ್ನು ಇಳಿದು ಮಂಗಗಳೆಲ್ಲ

ಟೋಪಿಯ ಬುಟ್ಟಿಗೆ ಕೈಯಿಟ್ಟು

ಸಿಕ್ಕಿದ ಟೋಪಿಯ ತಲೆಯಲಿ ಇಟ್ಟು

ಮರದಲಿ ಕುಳಿತು ಕೀಯೆನಲು

ಎಚ್ಚರಗೊಂಡು ದಾಸಪ್ಪನು

ಬುಟ್ಟಿಯ ಒಳಗೆ ಕೈಯಿಡಲು

ಟೊಪ್ಪಿಯು ಕಾಣದೆ ಕಂಗಾಲು
ಮರದ ಮೇಲೆ ಕಪಿಗಳ ತಲೆಯಲಿ
ಟೊಪ್ಪಿಗಳೆಲ್ಲ ರಂಜಿಸಲು
ಪಕ್ಕನೆ ಉಪಾಯ ಹೊಳೆದು ದಾಸನು
ತನ್ನ ಟೊಪ್ಪಿಯ ತೆಗೆದೆಸೆಯೆ
ಕಪಿಗಳೆಲ್ಲ ಅದನೋಡುತ
ಎಸೆದವು ಟೋಪಿಯ ಸಿಕ್ಕೆಡೆಗೆ
ಎಲ್ಲ ಟೊಪ್ಪಿಯ ಕೂಡಲೇ ದಾಸನು
ಬುಟ್ಟಿಯ ಒಳಗೆ ತುಂಬಿಸುತ
ಕೂಡಲೇ ನಡೆದನು ವ್ಯಾಪಾರಕ್ಕೆನ್ನುತ
ಪಕ್ಕದ ಊರಿಗೆ ತಾ ನಗುತ !

(ಕವಿ : ಸುಬ್ರಹ್ಮಣ್ಯ ಭಟ್ )

***

ದೇಶ ಭಕ್ತಿಗೀತೆ

2008-11-28T09:36:00.002+05:30

ವಿಶಾಲ ಭಾರತ
ಭವ್ಯ ದಿವ್ಯ ಭಾರತ
ಸಂಸ್ಕೃತಿಯ ನೆಲೆಯು ಭಾರತ

ಪ್ರಕೃತಿ ಸೌ೦ದರ್ಯದಿ
ಜಗದಿ ದಿವದಿ ಮೆರೆಯುವ
ಪುಣ್ಯ ಭೂಮಿ ನಮ್ಮ ಭಾರತ

ಎದ್ದೇಳಿ ವೀರ ಪ್ರಜೆಗಳೇ
ಶಾಂತಿಗಾಗಿ ಮುನ್ನಡೆಯಿರಿ
ಭ್ರಾತೃತ್ವವವನ್ನು ಬೆಳೆಸಿರಿ
ಒಂದಾಗಿ ಕೂಡಿ ಬಾಳಿರಿ

ವಿಶಾಲ ಭಾರತ

ಭವ್ಯ ದಿವ್ಯ ಭಾರತ

ಸಂಸ್ಕೃತಿಯ ನೆಲೆಯು ಭಾರತ

***

ನಮ್ಮ ಕನ್ನಡ ನಾಡು

2008-11-27T13:39:00.002+05:30

ನಮ್ಮ ನಾಡಿದು ನಮ್ಮದು

ನಮ್ಮ ಕನ್ನಡ ನಾಡಿದು

ನೆಮ್ಮದಿಯ ತವರೂರಿದು

ಕಂಗು ಬೆಳೆಯುವ ನಾಡಿದು

ತೆಂಗು ಬೆಳೆಯುವ ನಾಡಿದು

ನಮ್ಮ ಕನ್ನಡ ನಾಡಿದು

ನಮ್ಮ ನಾಡಿದು ನಮ್ಮದು

ಅರಳು ಮಲ್ಲಿಗೆ ನಾಡಿದು

ಕೆಂಡ ಸಂಪಿಗೆ ನಾಡಿದು

ಕೋಗಿಲೆಯ ತವರೂರಿದು

ಭಾರಿ ಸೊಬಗಿನ ನಾಡಿದು

ನಮ್ಮ ಕನ್ನಡ ನಾಡಿದು
ನಮ್ಮ ನಾಡಿದು ನಮ್ಮದು

ಬತ್ತ ಬೆಳೆಯುವ ನಾಡಿದು

ಮುತ್ತು ಬೆಳೆಯುವ ನಾಡಿದು

ಹೊನ್ನು ಬೆಳೆಯುವ ನಾಡಿದು

ಅನ್ನ ನೀಡುವ ನಾಡಿದು

ನಮ್ಮ ಕನ್ನಡ ನಾಡಿದು
ನಮ್ಮ ನಾಡಿದು ನಮ್ಮದು

ಹಲವು ಕವಿಗಳ ಬೀಡಿದು

ವೀರ ಶೂರರ ನಾಡಿದು

ನಾವು ಹುಟ್ಟಿದ ನಾಡಿದು

ತಾಯಿ ಹುಟ್ಟಿದ ನಾಡಿದು

ನಮ್ಮ ಕನ್ನಡ ನಾಡಿದು
ನಮ್ಮ ನಾಡಿದು ನಮ್ಮದು

(ಕವಿ : ಮ.ಸಂ. ರಾವ್ )

***

ಕಿಟ್ಟಪ್ಪ

2008-11-26T22:28:00.001+05:30

ರೊಟ್ಟಿ ಅಂಗಡಿ ಕಿಟ್ಟಪ್ಪ
ನನಗೊಂದು ರೊಟ್ಟಿ ತಟ್ಟಪ್ಪ

ಪುಟಾಣಿ ರೊಟ್ಟಿ ಚೆ೦ದಕೆತಟ್ಟಿ
ಅಂಗೈಲಿಟ್ಟು ತಾರಪ್ಪ

ರೊಟ್ಟಿ ಅಂಗಡಿ ಕಿಟ್ಟಪ್ಪ

ನನಗೊಂದು ರೊಟ್ಟಿ ತಟ್ಟಪ್ಪ

***

ಕಂದನ ನಗು

2008-11-25T08:45:00.001+05:30

ತಣ್ಣನೆ ರಾತ್ರಿಯ ಆಕಾಶದಲಿ
ಚಂದಿರ ನಗುತಿದ್ದ
ಅಮ್ಮನ ಕೂಡೆ ಅಂಗಳದಲ್ಲಿ
ಕಂದನು ಕುಳಿತಿದ್ದ

ಮಲ್ಲಿಗೆ ಹೂವಿನ ಪರಿಮಳ ಮೆಲ್ಲನೆ
ತೇಲುತ ಬರುತಿರಲು
ಮಿಂಚುಹುಳವು ಮಿರಿ ಮಿರಿಗುಟ್ಟುತ
ಬಳ್ಳಿಯ ಬಳಿಯಿರಲು

ಹಚ್ಚಿದ ಹಣತೆಯ ಹಿಡಿಯುತ
ಬಂದಳು ಅಕ್ಕನು ತಾನಾಗಿ
ಪಕ್ಕನೆ ಎಣ್ಣೆಯ ಕುಡಿಕೆಯ
ಮರೆಯಲು ಅಪ್ಪನು ಒಳ ಹೋಗಿ

ದೀಪವನಿರಿಸಲು ತುಳಸಿಯ
ಬುಡದಲಿ ಕೈಜೋಡಿಸಿ ನಿಂತು
ದೇವರ ನೆನೆಯುವ ಪರಿಯನು ಕಂಡು
ಕಂದಗೆ ನಗು ಬಂತು .

(ಕವಿ : ಸುಬ್ರಹ್ಮಣ್ಯ ಭಟ್)

***

ಬಣ್ಣದ ವೇಷ

2008-11-24T13:44:00.002+05:30

ಬಣ್ಣದ ಮನೆಗೆ ಅಣ್ಣನ ಕೂಡೆ

ಪುಟ್ಟಣ್ಣನು ಹೋಗಿದ್ದ

ಬಣ್ಣದ ವೇಷವ ಬರೆವುದ ಕಂಡು

ಕಣ್ ಕಣ್ ಬಿಟ್ಟಿದ್ದ

ರಂಗದ ಮೇಲೆ ಭಾಗವತನು

ಹಾಡನು ಹಾಡಿದ್ದ

ಬದಿಯಲಿ ನಿಂತು ಶಂಕರಣ್ಣನು

ಚೆಂಡೆಯ ಬಡಿದಿದ್ದ

ದೂತನು ಬಂದು ನಾಥನ ಮುಂದೆ

ಲಾಗ ಹಾಕಿದ್ದ

ನಾಥನು ಹೋಗಿ ರಕ್ಕಸರೊಂದಿಗೆ

ಸಮರವ ನಡೆಸಿದ್ದ

ಸೋತ ನಾಥನು ಹರಿಯ ಮುಂದೆ

ಕೈ ಜೋಡಿಸಿ ನಿಂತಿದ್ದ

ಅಭಯವನಿತ್ತ ಹರಿ ಬೇಗನೆ ಬಂದು

ಚಕ್ರವ ಬಿಟ್ಟಿದ್ದ

ಭೀತಿಯಿ೦ದ ಓಡಿದ ರಕ್ಕಸ

ಬಣ್ಣದ ಮನೇಲಿದ್ದ

ಮೆಲ್ಲನೆ ವೇಷವ ಕಳಚುತ

ನೋಡಿರೆ ಮಾಲಿಂಗಜ್ಜನಾಗಿದ್ದ !!

(ಕವಿ : ಸುಬ್ರಹ್ಮಣ್ಯ ಭಟ್ )

***

ರಾಷ್ಟ್ರಧ್ವಜ

2008-11-23T14:36:00.003+05:30

ಬಾರಣ್ಣ ನೋಡಣ್ಣ

ಓ ಮುದ್ದು ಚಿಣ್ಣ

ಬಾನಿನಲಿ ಹಾರುತಿದೆ ರಾಷ್ಟ್ರಧ್ವಜವಣ್ಣ

ಮೇಲೆ ಕೇಸರಿ ಬಣ್ಣ

ನಡು ಬಿಳುಪಣ್ಣ

ಕೆಳಗೆ ಹಸಿರು ಬಣ್ಣ

ನಡುವೆ ಚಕ್ರವಣ್ಣ

ಬಾರಣ್ಣ ನೋಡಣ್ಣ
ಓ ಮುದ್ದು ಚಿಣ್ಣ
ಬಾನಿನಲಿ ಹಾರುತಿದೆ ರಾಷ್ಟ್ರಧ್ವಜವಣ್ಣ

ಪುರಿ ಮಾರುವವನು

2008-11-21T21:16:00.002+05:30

ಪುರಿಗಳ ಅಂಗಡಿ ನಾಗಣ್ಣ

ಕೊಡು ನಾಕಾರು ಪುರಿಯನ್ನ

ಬುರುಬುರು ಉಬ್ಬಿದ

ಕೆಂಪಗೆ ಕಾಯ್ದಿಹ

ಕಟ್ಟೋ ನನಗೆ ಪುರಿಯನ್ನ

ರುಚಿ ರುಚಿ ಪುರಿ

ಬಿಸಿ ಬಿಸಿ ಪುರಿ

ಬೇಗನೆ ಕೊಡೋ ನಾಗಣ್ಣ !

***

ಕೃಷ್ಣ

2008-11-20T15:59:00.002+05:30

ಪುಟಾಣಿ ಕೃಷ್ಣ

ಪುಟ್ಟ ಪುಟ್ಟ ಅಂಗೈ

ಭಲಾರೆ ಗಡಿಗೆ

ದೊಡ್ಡ ಬೆಣ್ಣೆ ಮುದ್ದೆ

ತೆಗೆದ ಮುಕ್ಕಿದ

ತೆಗೆದ ನೆಕ್ಕಿದ

ಕೈಯೆಲ್ಲ ಬೆಣ್ಣೆ

ಮುಖವೆಲ್ಲ ಬೆಣ್ಣೆ

ತುಂಟ ಕೃಷ್ಣ

(ಕವಿ : ಜೆ. ಪಿ. ರಾಜರತ್ನಂ )

***

ಹಣ್ಣು ಮಾರುವವನು

2008-11-19T20:31:00.003+05:30

ನಂಜನಗೂಡಿನ ರಸಬಾಳೆ

ತಂದಿಹೆ ಕೊಡಗಿನ ಕಿತ್ತಳೆ

ಬೀದರ ಜಿಲ್ಲೆಯ ಸೀಬೆಯ ಹಣ್ಣು

ಬೆಂಗಳೂರಿನ ಸೇಬಿನ ಹಣ್ಣು

ಕೊಳ್ಳಿರಿ ಮಧುಗಿರಿ ದಾಳಿಂಬೆ

ಬೆಳವಲ ಬಯಲಿನ ಸಿಹಿಲಿಂಬೆ

ಬೆಳಗಾವಿಯ ಸವಿ ಸಪೋಟ

ದೇವನ ಹಳ್ಳಿಯ ಚಕ್ಕೋತ

ಗಂಜಾಂ ಅಂಜೀರ್ ತುಮಕೂರ್ ಹಲಸು

ಧಾರವಾಡದ ಆಪೂಸು

ಮಲೆನಾಡಿನ ಅನನಾಸು

ಕೊಳ್ಳಿರಿ ಮರೆತು ಸಿಹಿ ತಿನಿಸು

ನಾಲಿಗೆ ಬರವನು ಕಳೆಯುವವು

ದೇಹದ ಬಲವನ್ನು ಬೆಳೆಸುವವು

ಕೊಳ್ಳಿರಿ ಬಗೆ ಬಗೆ ಹಣ್ಣುಗಳ

ಕನ್ನಡ ನಾಡಿನ ಹಣ್ಣುಗಳ

***